啱啱喺友賽大勝匈牙利3:0嘅德國，喺今夏世盃決賽周，或者唔係最好波同最有冠軍相，不過肯定識搞花臣。為咗今屆賽事，呢支3屆冠軍專誠出咗本叫《球員》（DieSpieler）嘅寫真，仲搵埋幫過《Vogue》同埋《VanityFair》等時裝雜誌影相嘅大師EllenvonUnwerth操刀，出嚟影到班球員好似明星咁，真係唔打得都睇得。
世盃前出黑白寫真
德國想用圖片嚟表達今屆世盃代表隊成員，喺場外嘅另一面，於是喺老西供應商Strenesse、攝影師EllenvonUnwerth同出版商協助下，喺月頭出咗本200頁嘅黑白（monotone）寫真。
有份做模特兒嘅舒韋恩史迪加（小豬）話：「呢輯相真係正，同我哋平時嗰啲好唔同，我超鍾意。講真我哋平時冇着開呢啲衫，亦冇擺過咁嘅『甫士』，所以影嗰時好生硬。好彩攝影師有耐性，不斷咁鼓勵我哋放膽去做。」「小豬」繼續話：「我平時真係唔會戴呢種帽，因為好唔襯我，但估唔到影出嚟咁型。除咗我，我班隊友都對呢本寫真好滿意。」
波歷克做封面最慘情
同「小豬」一齊效力拜仁兼好老友嘅馬里奧高美斯，就喺影相嘅時候扮鬼扮馬，又唱歌又彈結他，搞到班隊友鬼咁開心。「小豬」話：「我本身同高美斯好friend，對佢相當了解。佢真係好有表演慾，仲好識搞氣氛。」
除咗德國班球員，教練路維同佢助教費克、高普基都有登場，唔話得啦。美中不足係封面人物波歷克因足踝受傷踢唔到世盃，真正睇得唔打得。
《趣聞》
放半日唞唞 卡卡即刻玩入窿
上個禮拜四已飛到約翰內斯堡集訓嘅巴西，操咗兩日，星期六下晝終於「放監」有半日假自由活動。大部份森巴國腳都留喺酒店打機同打乒乓波，或行商場掃貨。生於中產家庭嘅卡卡（圖）果然唔同啲，捉埋啱啱捧咗歐聯嘅門將施薩索拉斯玩高檔，拉隊去酒店隔籬嘅高爾夫球場打番幾桿出身汗，巴迪斯達同幾個鍾意呢種入窿遊戲嘅隊友仲跟埋去㖭。
卡卡射罰球都幾耍家，唔知佢打高球識唔識一桿入洞呢？出名嚴格嘅教練鄧加都算有人情味，講明唔阻止球員放假時間同老婆仔女敍天倫。呢位教頭放假做乜？原來以身作則喺酒店健身做運動，真係抵佢成46歲人，身形仲好似踢波嗰陣咁fit！
唔睇好英荷 古列治獨愛巴西
南非世界盃決賽周仲有唔夠兩個禮拜就開波，所以呢輪亦有唔少名宿出嚟講吓自己嘅心水，其中荷蘭球王古列治（圖）就唔睇好自己祖家，同埋歐洲另一熱門英格蘭，相信呢兩個國家最多入4強，反而認為巴西可以第6次成為冠軍。
古列治話巴西冇咗幾個球星後反而夠晒實際，陣中有個好龍門（施薩索拉斯）同埋一條好嘅防線，而且前面班攻擊球員亦入到波，因此好有條件攞世界盃。咁又係，國際米蘭之所以能夠捧走歐聯冠軍獎盃，教練摩連奴都係靠呢招，所以古列治睇好巴西捧盃亦唔係冇道理。巴西球王比利出名係烏鴉口，貼邊隊死邊隊。就睇吓古列治究竟係名家定係明燈？
謝四太吹雞 約WAGS睇《色慾2》
碧咸因傷冇得幫英格蘭打南非世盃決賽周，連帶佢老婆維多莉亞都冇得做WAGS嘅阿頭，之後有傳朗尼太太高蓮同埋謝拉特老婆古倫（右）爭頂佢個位。古倫日前就出招，約埋澳洲球星基維爾嘅太太雪妮，一齊去睇《色慾都市2》嘅首映。
查實當家陣效力加拉塔沙雷嘅基維爾仲喺利物浦比賽時，古倫同雪妮經已好老友，周不時約埋一齊去飲茶同shopping。家陣連澳洲WAGS嘅代表人物都係古倫嘅人，證明古倫真係唔簡單，人際關係網好闊。話時話，如果英格蘭喺C組拎首名，而澳洲就喺D組次名晉級，佢哋兩隊到時就會喺16強碰面。睇怕到時古倫同埋雪妮會暫時拋開彼此嘅友誼，幫自己老公隊波打氣。
衫衫不盡
世盃A-Z
W（Win）
巴西是世盃史上取得最多勝仗（Win）的國家。他們於18屆共92場比賽，取得64勝14和14負的成績。
X（Xhosa）
科薩語（Xhosa）是非洲南部科薩族所使用的語言，也是南非的官方語言之一。
Y（Youngest）
北愛爾蘭名將韋西迪是世盃史上最年輕（Youngest）的上陣球員。82年他以17歲零42日之齡，替北愛於分組賽出戰南斯拉夫，雙方最後打和0:0。
Z（Zidane）
施丹（Zidane、圖）在98年決賽對巴西梅開二度，令法國首度捧盃，但於06年世盃決賽因頭撞意大利後衞馬特拉斯而領紅出場，用遺憾來結束職業足球生涯。法國最終於互射12碼負意大利，未能第2度捧盃。
鬥獸場踢世界盃
話你知：第14屆世界盃（1990年）在意大利舉行，決賽由阿根廷對西德，最終西德1:0勝出，第3次奪冠；海報使用羅馬鬥獸場作為主題，加入足球場圖像，代表世界盃在羅馬舉行的概念。此屆的最特別之處為首次設有主題曲，曲名為「Un'estateitaliana」，香港歌手譚詠麟更改編成「理想與和平」。
球場介紹
德班球場
DurbanStadium
城市：德班
容納人數：69,957
舉行比賽：
14/06 D組 德國vs澳洲
16/06 H組 西班牙vs瑞士
19/06 E組 荷蘭vs日本
23/06 B組 尼日利亞vs南韓
25/06 G組 葡萄牙vs巴西
28/06 16強 E組首名vsF組次名
08/07 準決賽
簡介：德班球場原名摩西馬布海達體育場，是以前任南非共產黨秘書長命名，但因國際足協不允許非指定的贊助商或人名出現主辦球場的冠名，才將其改為德班球場。球場另一特色是頂部貫通兩邊龍門方面的高架橋，晚上在燈光襯托下猶如彩虹。
曼德拉灣球場
NelsonMandelaBayStadium
城市：曼德拉灣市
容納人數：46,082
舉行比賽：
12/06 B組 南韓vs希臘
15/06 G組 科特迪瓦vs葡萄牙
18/06 D組 德國vs塞爾維亞
21/06 H組 智利vs瑞士
23/06 C組 斯洛文尼亞vs英格蘭
26/06 16強 A組首名vsB組次名
02/07 半準決賽
11/07 季軍戰
簡介：球場今年才正式開幕，造價高達1.5億美元，可作欖球比賽及演唱會之用，而去年夏天原本作為洲際盃場地，但最終因未準備好而擱置。另球場上蓋設計獨特，天頂部份如一塊塊花瓣，從上方向下看別具特色。
