政府為打壓六四21周年紀念活動，屎橋賤招盡出，當中要數最低裝嘅，莫過於係用未申請娛樂牌照，先後搶走兩個民主女神像同六四浮雕呢招。
為捍衞女神像被警方拘捕嘅支聯會副主席李卓人，噚日就話多得班警察強搶民產，「有幸」首次品嚐「皇家飯」，據知係一盒粟米雞皇飯。到噚晚阿人又拉咗去北角警署，連續兩晚喺咁嘅情況下食皇家飯，對香港嘅人權法治肯定唔係好事。
噚日遊行時，唔少市民見到阿人都叫佢撐住，一定要攞番個民主女神像。著名博客林忌就狂插政府今次引用《公眾娛樂場所條例》告支聯會做法荒謬，認為只有特區政府，至會無良到視六四屠城為娛樂節目。