名模周汶錡前晚穿上9萬元旗袍現身上海灘活動，展示摩登中國美。曾與她法籍男友JulienLepeu一吻出位的女歌手張苡澂，今個月搶先和富商結婚，更揀正周汶錡生日出嫁，相當攞景。周汶錡前晚被問到張苡澂婚事時，嗤之以鼻，左一句「唔識」，右一句「唔知」，堅拒祝福對方。
上海灘支持英國藝術家SimonBirch的「Hope&Glory」作品展，前晚在鰂魚涌閉幕，大會送了名模CaraG.、Rosemary、名媛陳斯允、陳姿允姊妹等五疋綢緞，眾女穿上自己設計的新裝現身，其中CaraG.的bratop露背長裙，露出其16歲時後腰位的紋身。
「唔明你哋問乜」
近月曝光率大減的周汶錡，獲厚待穿上獨一無二、價值9萬元的粉紅喱士旗袍。Kathy男友之前啜爆的奀星張苡澂，早前結婚嫁予富商，無獨有偶更選在Kathy生日當天（5月20日）行禮，周汶錡聞言拒絕回應說：「我唔識佢，冇乜要答。」會否祝福張苡澂？周汶錡冷待說：「我都唔識佢，唔明你哋問乜？」
被問婚期即扯火
問到男友還有否跟張苡澂聯絡，Kathy即一問三不知，顯得有點不耐煩，至於自己何時結婚？Kathy一樣反感說：「唔想將呢啲嘢拉埋一齊講。」她透露父親節期間，因妹妹周麗淇忙出碟，男友又不在港，只有自己陪伴父親慶祝。
同場染了一頭金髮的歌手劉晨芝，為好友王友良開腔，指摘椋名凜私自在日本影全裸照，她說：「係呀，好cheap呀，唔可以整到咁cheap，又唔係拍戲，我有睇過啲相，真係過火咗啲，model唔應該咁樣影相囉。」
採訪、攝影：JessicaNgan