部份泛民主派上星期同中聯辦副主任李剛見面，其實好多人都唔睇好呢次所謂嘅破冰溝通。《城市論壇》噚日請咗民主黨主席何俊仁、民協馮檢基、普選聯副召集人黃碧雲出席，今次出手嘅係「事旦男」，佢喺廣告時段高舉「民協，又Eat又Take」同「民主黨擋民主；普選聯亂普選」標語，一箭三鵰；搞到台上嘅泛民表情同噚日個天一樣：黑晒。
咁又公平嘅，唔單止淨係保皇派至會俾人針對，就算「泛民」呢個招牌，對你有意見一樣冇面畀。論壇上維園阿哥對何俊仁同馮檢基一啲都唔客氣，當中常客「馬草泥」任亮憲話噚日真正嘅民主派全部坐晒喺台下，諷刺坐喺台上嘅何俊仁佢哋係民主假貨。
雖然噚日馮煒光等民主黨多名第二梯隊嘅黨員，都有落去撐場，火併班維園阿哥，但人哋有主場之利，氣勢始終係維園阿哥勁啲。