首同一班高官前日總動員搞Roadshow推銷政改爛方案，仲對住鏡頭振臂高呼「起錨」，睇落不知幾興奮，八方諗咗一陣，都唔明點解要揀起錨做口號，唔單止俾網友改成「超錯」、「收皮」，好多老香港聽到個字，仲勾番起當年一段慘痛嘅回憶。
嗌口號唔齊冇自信
煲呔率領三司十二局官員喺鏡頭前大叫「我哋一齊起錨、起錨、起錨……」煲呔明顯聲底薄，後面做大茄嘅高官又拍子唔齊，搞到成段口號冇自信、又唔齊心。單單睇咁嘅促銷宣傳政改，會有幾多人收貨？大家都心知肚明。
其實「起錨」喺廣東話亦有唔同意思。有前輩同八方講，當年好多內地同胞用唔同方法偷渡嚟投奔自由到香港，仲諗出各種術語表達；「較腳」代表偷渡，坐火車偷渡就叫「撲火龍」，陸路玩命叫「撲網」，游水係「督卒」，至於坐船偷渡就叫「起錨」。除咗走佬會用到之外，喺飲食界老師傅口中，起錨係被人炒魷嘅意思。
今次煲呔用起錨推政改，好明顯係用盡晒呢個名詞嘅所有意思。首先，呼籲大家無謂再爭取，要嗱嗱聲通過政改爛方案；唔得嘅話就行第二步，煲呔嘅治港團隊會喺爛方案一旦被否決之後，按照飲食界嘅意思齊齊炒魷收場，以人頭計咁樣炒魷，好可能會轟動過五區總辭。到嗰時大家若果仲係堅持要真普選，大可以用包括偷渡或者最好係合法方法離開香港，去有普選嘅地方享受普選真民主樂趣。
煲呔團隊唔只軟弱無力咁叫政改起錨，批高官仲幾乎冇人提過爛方案有乜內容，咁樣sale畀市民，又點會有人buy吖。維園阿哥「馬草泥」前日成功突襲特首，佢噚日喺《城市論壇》公開佢同特首嘅一分鐘對話，佢話特首只識賣花讚花香，話香港大多數人都支持政改方案，之後仲同佢講，「你聽話啦，你嘅表演時間已經夠。」馬草泥批評，特首咁講，反映佢唔單止係視民意如浮雲，而且置民望於不顧，唔理市民意見，「特首當我做騷，我話佢先係真正做政治騷。」
mailto:[email protected]