富士康大老闆郭台銘到深圳工廠視察前後，就發生兩單員工跳樓事件，佢到之前有第十一件，佢道歉之後就有第十二件，然後又有員工割脈，乜咁鬼邪o架。富士康發生十三宗自殺事件，十人死亡，當然引起世界矚目，令大股東鴻海集團，大老闆郭台銘，深圳市政府，以至中國政府都感受到國際傳媒壓力，凡係上市公司老闆都想在CNBC頻頻出鏡，偏偏郭台銘以錯誤理由曝光，直情有損富士康股價。
與廠家Ｌ談起，佢話在內地開廠，管理係一件相當頭痛之事，因農村農民出城打工，對工廠生產技術、規矩、規律、秩序等等，所知甚少，要由頭教起，同時要慎防有人做無間道，涉及偷竊、抄襲等事件，故此一般工廠都管得好嚴，特別係韓國人與台灣人開辦嘅工廠。韓、台工廠嘅高層、中層管理人幾乎全部服過兵役，對軍事化紀律、管理比較熟悉，但香港老闆從不知當兵為何物，香港夥計亦無軍事經驗，所以廠家Ｌ講：「我哋香港人工廠唔識得乜嘢叫做軍事化管理，其實比較人性一啲，但正因如此，在擴充規模上，就差韓台一皮，巨型工廠係佢哋世界。」
不從異化、全球化、文化背景看問題，單係從個「錢」字入手，廠家Ｌ就話富士康雖然要徹底檢討管理制度，以免再有跳樓事件發生，但事件並非全部要由富士康孭晒上身嘅，睇富士康嘅2009年業績，營業額甚大，有72億美元，但稅後純利只得四千萬美元，純利低到係0.55%，即使計毛利（grossprofit）獲利率亦只係5.9%，可以講話係蠅頭小利，若果扣除非營運收入一億六千九百萬美元（利息、賣廢料以及外判subcontracting等等），就要虧本億幾美元㖭。之所以係咁，一個理由就係國際大客戶識得計數盡量壓價，同你計埋成本，訂單價只准你賺雞碎咁多。廠家Ｌ話：「我做過OEM，曾經此苦，實際上，我哋中台港工廠只為美國大牌子、世界大牌子打工，中國號稱世界工廠，實則飽受美國人剝削。試問一個智能電話，一對網球鞋，一台電腦，我哋嘅出廠價係幾多，去到美國嘅零售價又係幾多？美國客戶係唔加價，我哋點樣可以增加員工福利呀？」咁又係，在美國以五六百美元出售嘅電子產品，深圳出廠價一定唔夠一百美元，啲錢俾美國品牌賺晒。