雖然劉德華曾在投資拍片蝕大本，不過似乎未有打擊他的雄心，最近華仔再投資拍的新戲《打擂台》前晚舉行首映，他到場打氣，對於新戲票房，華仔寄望香港收600萬已心滿意足，對於上映日期對撼世界盃，華仔直言即使沒有世界盃，新戲也難有千萬票房。
劉德華近日再度做老闆投資拍新戲《打擂台》，力捧林家棟做監製，由一班老戲骨梁小龍、陳觀泰及泰迪羅賓，聯同年輕一輩的歐陽靖（MCJin）、黃又南及賈曉晨等演出，前晚新戲在觀塘舉行首映禮，吸引大批市民及圈中人支持，而霍震霆亦百忙中抽空到場打氣。現場舉行鬥rap比賽，勝出者即場和MCJin一較高下，不過得獎者表現較為緊張。
雙語版本攻內地
以往華仔投資拍片試過多次蝕本，問到今次對新作有何期望？華仔笑說：「希望有500、600萬票房，每個人嘅程度同可以跳得幾高，大家各自心中有數，知道個位喺邊，我呢套戲冇大導演大演員，只有一班前輩同新人。」
問華仔是否只要回本已經心滿意足？華仔透露此戲將可以在內地上映，較南的地方會以原本的廣東話版本上映，至於北京等地方，則有普通話版上映，但亦有少數有廣東話版上映，華仔坦言這個安排在內地來說是新嘗試。
投資開戲唔怕蝕
華仔估計在內地票房可以有2,000萬左右，他透露：「初步計算內地可以收到300至400萬，計埋香港票房，最多都係負100萬。」他表示自己做老闆開戲不是看蝕或賺，而是應該與否，但之前《72家租客》在內地上映，有部份觀眾不明白廣東話對白的笑位，華仔會否擔心有同樣情況出現？華仔表示他們有普通話版加上再配音配合，相信問題不大。
對於新戲下星期上映撞正世界盃開鑼，華仔稱：「我相信影響好細，因為觀眾層次完全唔同，就算冇世界盃，我哋都唔會成為千萬片。」
採訪、攝影：藍文浩
