富士康深圳廠連續有12個員工跳樓，引起各界關注，永盛電影公司老闆向華勝前晚同黃曉明食飯都講起呢件事。向華勝認為發生呢種悲劇，富士康老闆郭台銘都唔想，唔應該將矛頭全部指向佢，但向華勝都呼籲郭老闆要改善管理方法。
發哥：加班時間太長
向華勝建議富士康搞好文娛活動，提高晉升機會，鼓勵員工士氣，仲有掛喺身上嘅電子監察牌應該取消，等員工保留私隱。黃曉明就提議向華勝將永盛嘅戲免費提供畀富士康深圳廠員工睇，向華勝話：「好，如果能夠阻止悲劇再發生，永盛嘅舊作同新作都免費提供畀佢哋，我公司拍嘅戲以喜劇為主，應該可以帶到歡樂畀員工。」佢又話應該取消自殺撫恤金，以免助長自殺風氣。
永盛公司以前製作過唔少賣座作品，好似《賭神》、《逃學威龍》同《整蠱專家》等，新作就有《唐伯虎點秋香2之四大才子》。曾主演《賭神》嘅周潤發噚日都贊同向華勝嘅提議，佢話：「向生提供免費戲畀富士康員工睇，梗係好事，但佢哋加班時間太長啦，就算有免費戲都未必睇到，所以郭台銘首先要改善管理方法，最好參考吓歐美國家嘅管理學，咁樣先可以提高員工歸屬感。」
另外，黃曉明食飯前，先到青衣城出席活動，他用廣東話唱出片中嘅一段歌：「燒雞翼，我鍾意食，但係你老母講你就快釘。」但佢唱「你老母」三個字時差啲變粗口。問佢有冇唱歌畀緋聞女友Angelababy聽？佢話：「我們有一起唱K，很多朋友一起。」佢又話嚟香港曾打電話畀Baby，但冇見面。有消息指佢經常送禮冧Baby，佢解釋：「合作過對我好，我都會送。」
黃曉明又話拍戲時送咗個繡有「愛你，娘」嘅暖包畀拍檔朱咪咪，問佢會唔會喺送畀Baby嘅禮物上寫「愛你」，佢用廣東話話：「冇！」被問到有傳轉投林建岳，佢話考慮中。