李超人日前發表偉論，直言金融風暴過去後，通脹一定重臨，有錢就不妨買樓自住，唔會有好大問題。其實，有關論點可能好多人都識，星俠近期都建議有銀人士不妨趁機置業，但睇落好似無乜人理我，反映同一句說話由唔同人講出來，效果可以唔一樣。
大風大雨的5月份即將玩完，散戶如能捱得過呢一次考驗，炒股經驗應有所增長。炒股輸贏兵家常事，最緊要係識自己查找不足，深刻檢討所犯錯誤，盡力令自己唔再重蹈覆轍，能持之以恒，投資獲利自然將更順遂。
國藥控股（1099）自去年9月上市之後，股價一直唔錯，散戶聞風跟炒，捧場者眾。最近唔少散戶「烽煙」叩門求救，事關該股5月份表現走晒樣，由一個月高位37.4元急瀉至26.1元方能出現反彈，擺明有基金洗倉。
國藥無疑係內地業內領導者，但要留意，該股雖調整不少，但現價市盈率仍高達50倍，估值實在過高，有貨要趁反彈減持，跌至20元水平才稍為有吸引力。
方星俠