標題這句話，不是我講的，是我朋友講的。
（其實就算是我講的，都不能認，一定要說是「我朋友」講的，但今次真的是我朋友講的。雖然，作為聽者，我不能贊同更多。）
是當他被問及：「為甚麼你花那麼多錢買衫而不買樓？」時，他的血淚控訴。
年薪過千萬的人，也要血淚控訴？沒錯，不論貧富身份階層，每個人都有自己的難處，每人都有自己的「富士康」。
你又買衫？
我知道「我朋友」以上這番話，一定得不到很多人的同情，甚至可以兌換5倍數量的「抵死」「晒命」「人心無厭足」……etc，etc。
我不知道別的地方會不會好一點，不過相信不會，但總之在香港，買很多衫的人是注定很受非議的，如果不是用「歧視」這個更嚴重的字眼的話。
消費品的目的，有名你叫，就是「消費」吖嘛大佬，你理得我「為了用而買」還是「為了買而買」吖！總之不是偷不是搶我花我的錢換我的開心，實在是關你屁事？
偏偏「又炒股票？」是不會有人鬧的，同樣地「又買樓？」「又買金條？」甚至「又食鮑魚？」都不大構成責怪，所以也不太流行，證明一個人怎使用自己的財富都有被世俗「認可」與「不認可」之分。「又買車？」「又買鑽石？」「又買相機？」已鬧得比較振振有詞，但總不及話人「又買衫/鞋/袋？」那麼大聲夾惡敵愾同仇，彷彿花錢買衫是人類近乎最劣等的行為，僅僅好過買毒品和買大細少少。
所以任何買衫買得狠的人一旦有甚麼冬瓜豆腐，得到的幸災樂禍指數都是最高的，你「有咁耐折墮」皆因你買衫買得太多「有咁耐風流」所引致的，並沒有人覺得賺錢賺得辛苦的人有權買時裝慰勞一下自己？
所以你看哪一種落水狗被人打得最大力？艾美黛的衣櫃裏如果起出的只是3,000台天文望遠鏡，民間的喊打聲音不會如此震天，雖然你估天文望遠鏡好平？同樣地MichaelJackson（米高積遜）行衰運時大家都是聲討他可能對小朋友有過的「不適當興趣」，而不是他一擲兆金打造的Neverland（夢幻樂園），對啊，畢竟在「物業」上洗腳唔抹是比較「又買衫？」正氣啊！
更不要說有甚麼天災人禍的時候了，愛買衫好扮靚的人一定第一批被推出來祭旗，「有咁多錢不如捐出嚟賑災啦仲着到周身名牌咁晒命！」我都被鬧唔少，也沒有人理你私下其實捐了多少做了多少，總之你最好傾家蕩產捐到爛身爛勢才算有人性有做嘢。也不見得鬧你的人自己捐到冇老鼠斑食冇紅酒飲，也未聽過有人罵「有咁多錢炒股不如放晒啲滙豐捐畀災民！」
可見買衫的人受到的無理鄙視是最多最大的。有心成為時裝精者最好有這種九百九十九夫所指的心理準備。
買衫買到冇屋住？
所以買了好多衫的人，如果被發現還沒有置業，萬萬不能哼一聲，絕大部份人都會認為「是你自己攞嚟的！」
人人都笑你買衫買咗份首期去，沒有人知道你就算不買將那些錢省下來，不見得夠上會，以近幾十年瘋狂飆升的香港樓價來說。
沒有人心水清到看得出，是橫豎點搵點儲都買唔到樓，才定期去南青山RueSt-Honor'e大出血的，反正總要花點錢輕鬆一下吧？
再看看「我朋友」，他專業人士，未婚，年入過千萬但相信「力不到不為財」所以拒絕任何大風險投機活動，助養了幾十個第三世界國家的小朋友再定期做義工，喜歡彈電結他並一星期上兩堂外文，此外並無特別嗜好……除了時裝。因此他買的衣服量比人多，價比人貴，便換來「你做乜唔買樓？」此等身邊過份肉緊的人的循環提問。
答曰：你以為年薪過千萬，即每個月一百萬好多錢咩？你知唔知家condition好少少嘅中半山二千零呎單位點都要四五千萬起錶？扣除衣食住行燈油火蠟「kicklick框嘞」基本開支當我每年儲600萬，也要8年完全唔買貴嘢才夠買層樓，人生有幾多個8年？有幾多個年入過千萬嘅8年？8年後儲夠錢嗰陣嗰層5,000萬嘅樓應該已升到過億，正如我10年前年入300萬時以為10年後今日會夠錢買我想買嗰層樓一樣？如果你明知一世人都冇可能追得到樓價的話，我賺埋賺埋啲錢唔使又有乜意義？只不過咁啱你鍾意黐絲帶花，佢鍾意深海浮潛，而我咁啱鍾意LV、Chanel、Gucci啫？
（咁你住平啲咁得囉？）
又答曰：信我，人望高處，當你年薪有番咁上下，你就唔想住非中心地區大型屋苑嘅千零呎單位o架嘞！
（咁你咪抵死囉，家陣喺香港，搵過千萬一年就係住「非中心地區大型屋苑千零呎單位」o架咋！）
？？？？？「我朋友」頓時無語。
然後，他在既憂且憤的情況下馬上去中環殺了一轉，提着價值十幾萬的幾個shoppingbag回到他月租15萬的舊山頂道2,800呎單位，一開門發現衣服鞋襪已差不多塞到出門口，下個月一定要搬去個更大更貴的地方才放得下那麼多衫時……他忍到這一刻才崩潰！
本周推銷
獻給所有很努力工作而又未買到樓的人，如果想買點令人暢快的東西，而又買厭了時裝的話，可考慮這尊小弟的FashionFigure，他未必會保佑你買到樓，也未必祝福你以後日日都着得靚，但以後有人再問你「又買衫？」的話，應該可拿出來邪一邪他們「收口！」的。
欲訂購者可於6月7日前到金鐘太古廣場Joyce查詢，或到 http://www.papamamason.com瀏覽，謝謝。
Textby黃偉文
本欄逢星期日刊出
mailto:[email protected]
微博 http://t.sina.com.cn/wymanwong
