周時有朋友叫左丁山去教書，教乜呢？原來最吃香嘅係教新聞傳播及公關課程。香港好多年輕人鍾意讀新聞系，而且普遍係公開考試成績優良嘅。佢哋明知傳媒工作職位少，難搵工，搵到又知道薪水低過人，與搵到銀行工嘅同學仔相差甚遠（計埋花紅、雙糧嘅話），但都係要讀新聞噃，真係可愛。既然咁多人讀，除咗中大浸大兩個老牌新聞系之外，港大前兩年加入戰團搶新聞系學生，樹仁大學以新聞系為生招牌，珠海書院新聞系亦係老字號，連啱啱改名為恒生管理學院嘅恒商亦話會開辦新聞學士課程，追上三個已獲審批嘅工商管理、商務翻譯，與供應鏈管理學位課程。恒生管理學院有錢有地方，更位於沙田，離中文大學不遠，中大教授嘅退休年齡係五十五至六十歲，以今時今日計，仲係精壯之年，而且教學經驗豐富㖭，佢哋住慣沙田，退休後有恒商招手，情投意合啦，故此中大一啲有名教授如李天生、劉可復、方梓勳、陸潤棠等，以至尚在當打之年嘅蘇偉民都過檔恒商，聽講仲會有現役資訊科學教授走埋過去㖭。
咁講法，大學新聞系不斷搵經驗豐富嘅傳媒老手去教書。新聞呢樣嘢，不能100%聽博士學者講理論，必須同時注重經驗與實踐，故此啲傳媒老總副老總最受大學新聞系/公關/傳訊課程歡迎。肯教嘅話，一定有兼職，錢就梗係少少地啦！呢日又有人打電話嚟問左丁山制唔制，左丁山不假思索，畀咗啲老波骨名字佢，叫佢自己去求人。
第二日，碰到前政府新聞處處長丘李賜恩女士，問佢除咗做義工之外，有冇教書，佢即刻話：「有，中大傳訊碩士課程，我開一科o架！」跟住又收到公關界老行尊/前輩張林森（ForrestCheung）電郵，話佢在中文大學專業進修學院開辦嘅「公共關係及傳播管理高等專業文憑課程（AdvancedProfessionalDiplomaProgrammeinPublicRelationsandCommunicationsManagement）」，七月底開辦第三屆，分十個課程模式（Modules），由市場傳訊、傳媒關係、公關寫作及演述技巧，以至僱員溝通、危機管理、財務公關、投資者關係等等；咁多瓣，只有張老兄先至夠膽開科，左丁山自嘆弗如。想入讀，唔該去中環美國銀行大廈中大專業進修學院查詢，或者上網！