真係世界變，港鐵日前公佈下個月13號加價，搭港鐵用八達通竟然貴過單程票。本住為民請命，小妹為大家做咗啲嘢（當然唔係衝擊港鐵），係喺40,000個車程內，搵咗邊104個車程有呢個情況。
慳一毫得一毫改用單程票
家中有小朋友或長者嘅有「福」了，因為你哋中咗獎，上述車程逾六成都係涉及特惠八達通（即係小童/長者票），都係貴過單程一毫，做父母帶仔女搭港鐵要睇清楚，慳得一毫得一毫嘛，有需要改用單程票啦。
如果你為人父母，仲住喺旺角東站、紅磡站附近，咁你直情中咗「頭獎」，皆因呢類八達通貴過單程票嘅車程，遠超一半都係涉及呢兩個站，而且目的地真係「包羅萬有」，如港島嘅天后、炮台山，新界有元朗、朗屏、天水圍、屯門等。
單身嘅都唔好高興，因為有39個車程係八達通車費貴啲o架，而且雖然大部份係貴一毫，但都有16個車程貴咗兩毫o架，其中有8個車程都係涉及旺角東、紅磡站。
大家可以上港鐵網吓收費表，如果住喺旺角東、紅磡，或成日去呢兩度，就更加要睇多幾眼。 http://mtr.com.hk/chi/whatsnew/fam201005.html
電郵：mailto:[email protected]