一名70後的女子，一身D-mop、Liger潮look，任職至inbackpacker癲盡全世界。巴黎一站，她在鏡頭前四圍乞、坐霸王車、hightea嗌急屎；轉戰北京玩叠羅漢撻生魚，跟X-game族一樣膽生毛。
她是now100香港台旅遊節目《風行全世界》的主持杜如風，也是前嘉禾宣傳部經理杜惠東之女，綽號「可怕教主爛命倫」。周星馳搭軟硬天師上腦的她憑無厘頭風，榮升人氣主持。日本留學，浪蕩全球，邊行邊買是死性，老竇窮一生積蓄幫她找卡數，「我敗家o架。」她人仔細細聲大大，還自詡童顏巨語。你buy唔buy一件事，她繼續我行我素，果然如風。
撰文：朱倬誼、陳月媚
先後於加拿大和日本留學的杜如風，由旅遊書作家到近期主持now100香港台的包拍式旅遊節目《風行全世界》，跳出幕前竟成為網民女神。節目首站巴黎，杜如風無厘頭壯舉舉目皆是，用絲巾笠頭在巴黎鐵塔旁咪嘴唱伍詠薇的《失落於巴黎鐵塔下》；在聖心大教堂彈結他仔行乞；捐地鐵閘口坐霸王車；她介紹當地高檔餐廳，呷一口濃情化不開朱古力後突然嗌急屎。觀眾O晒嘴。
叠羅漢高處跌下
「真係即刻屙屎o架，之後有人鬧『你咁粗魯嘅，作為一個靚女唔可以講呢啲嘢。』靚女唔急得屎呀？醜嘅人先急得屎呀？唔通關之琳唔屙屎咩。」杜如風日前接受本報訪問，提起巴黎便便仍理直氣壯，有人覺得她神經刀，有人又覺得她夠生鬼。姑勿論你點睇，其製作之苦卻不足外人道。
杜如風說：「我會度點樣玩啲嘢出嚟有唔同，聖心大教堂有好多街頭表演，我為咗乞錢，特登學咗成個月結他仔o架。」包拍節目，對平日下午5時起床及自稱小弟的男人頭杜如風而言，最痛苦莫過於早起身及化妝，「我體力不嬲好多，係個腦辛苦，好多嘢都要即刻變。」加上膽大包天，危險動作定必親身上陣，「我上次去北京拍叠羅漢，爬到最高跌落嚟，我好鍾意唔要命玩，好鍾意玩跌，可以加入成家班。」月前她看LMF演唱會時玩插水，事後不知多回味，還開blog爆爛gag：「唔插唔知身體好，唔睇show又唔知自己rock得到！」
壓力大暴瘦焦慮
爆爛口頭禪仲有：「鬼影變幻球，斗零變大牛。」其亂噏概念來自周星馳，她口口聲聲愛梁朝偉，但心底最愛星爺，搭單尚有軟硬天師，「我哋嗰代由細到大都睇周星馳，佢啲戲入晒腦。我喺巴黎又全程聽住老人院（軟硬電台節目），坐車好眼瞓，聽整蠱電話先醒。」
風姐狂派一面癲癲得得，她也說：「我不嬲都係咁，TiTiKwan話我自然中作狀扮張曼玉吖嘛。」博派一面，她為工作廢寢忘食，巴黎一役回歸，體重竟暴跌至89磅。「中醫話我太緊張吸收唔到，其實開心背後我好辛苦。我晚晚喺studio剪6個鐘頭片，同一條片抽500次改完又改，又驚過火又想過火，所以有少少焦慮症，食唔到又瞓唔到。後來我每晚搵5分鐘望住啲衫，『我做得咁辛苦都係為咗你哋。』咁先開心番，家都應該有93磅嘅。」
70後童顏巨語
為衫死為衫亡，風姐係瀟灑不過難儲錢，她大笑：「你唔知自己幾時死，儲埋啲錢做乜呢，開心咗先啦。」因為她好玩，有網友視她為性幻想對象，她自摸胸部卡卡笑：「估唔到我以咁驕人嘅身形成為性幻想對象，今年書展我唔出書，我決定出水槍，嗰啲呢。」跟周秀娜同一market了，「係啦，以最細撼最大！」如風「虛齡」25，實情32冇走雞，一張童顏幫她唔少，但冇巨乳，「係童顏巨語，講嘢大聲，響亮呀。童顏係賺嘅，我70後o架啦。」
《風行全世界》播映時間
逢星期六8:30pm
now100香港台
杜惠東爆女兒賺百萬
杜如風的爸爸杜惠東（杜sir），是前嘉禾宣傳部經理，由於只有一粒女，難免錫到燶。風姐購物慾旺盛，杜sir退休前一直幫女兒找卡數，現在風姐自食其力，他又擔心女兒捱壞。
為女找卡數
杜如風說：「老竇想我努力做嘢，咁就唔使幫我找卡數，佢成日打嚟問我身體有冇事，因為我奀，驚我捱唔到。我家養番佢o架啦，當然佢係一個唔使錢嘅人，其實佢好慘，將所有積蓄畀晒我買嘢，本來佢嘅人生應該幾美滿嘅。」
阿爸搞唔掂，就由阿媽出馬制止阿女shopping，杜如風笑說：「我阿媽可以做FBI，佢捉得勁o架，我買完衫紙袋都唔攞，剪牌後塞落衣櫃底。我阿媽係中國文學老師、訓導主任，但呢一生就係教唔好個女，係件好慘嘅事，我真實地講係敗家。」過度活躍的風姐一直與雙親同住，她形容男朋友時有時冇，但從沒想過結婚：「阿爸唔想我嫁㖭，永遠喺屋企黐住佢。」
禁大肚返歸
另外，杜sir日前接受本報訪問，提起如風就笑瞇瞇說：「唔好睇我個女平時大癲大肺，其實佢好精明，佢喺幾個國家讀過書同打工，又教過林青霞、鄧麗君同鍾楚紅溜冰，算有經歷，唔會咁易俾人呃到，不過佢啱啱出嚟做嘢時，我同佢約法三章，第一唔准大咗個肚返嚟屋企，第二要正經打工，第三快啲儲夠錢買屋。佢都好聽話，冇違反章程。」
去年杜sir退休，女兒已沒有再向他做伸手牌，杜sir說：「以前佢幫無綫收費台包拍一集旅遊節目得3萬蚊，幾乎貼錢做，家幫now係70萬一集，家個女戶口長期都有百幾萬，又叫我唔夠錢用就喺佢戶口攞錢用，但佢唔問我攞錢使，我都偷笑咯。」
出門9把刀
每位backpacker都有隨身法寶，杜如風每次出門，handcarry內必暗藏九武器。
1.偉仔寶麗萊
我嘅守護神梁朝偉先生，我當佢利是咁用，一上飛機就帶住放銀包。
2.Vintage紅框四鏡黑超
我會儲太陽眼鏡，呢副係喺巴黎拍嘢時買嘅。
3.Bicelle保濕產品hydraB5gel
誠意推介，一上飛機就搽，咁就唔乾燥啦。
4.日本感冒藥PABURON
推介多年，發燒專用，夜晚食咗就可以頂住。
5.Sofina防曬cream
防曬係出trip必備，唔係就曬到黑人咁。
6.鬧鐘
日本買嘅，1,980yen。插個i-pod放heavymetal音樂，「焚」到起身為止。
7.休足時間按摩貼
出trip行得多，晚晚返去貼，有時黐喺腳底度出去拍嘢。
8.SKIIwhiteningmask/eyemask
去唔同城市，天氣又乾又濕，夜晚一定要用。
9.Liger絲巾
呢條巾好緊要，喺飛機當被冚，大風、冷氣都可以用。
狂放扮嘢P
杜如風除了主持旅遊節目外，業餘興趣最愛扮嘢，每次開P造型一定驚人，而且扮嗰樣似嗰樣，唔到你唔服。
