第一拖拉機（038）既係H股超級現金牛，又係國策受惠股，但呢期股價照樣狂插，係時候。一拖最新手頭現金近12.1億元（人仔．下同），銀貸得1.4億銀，淨現金高達10.7億銀，銀彈豐厚兼穩陣到爆。一拖主打農業機械項目，單係今年首季度，收入增幅達到4成，而4月時，阿爺喺145億銀嘅農機具購置補貼資金基礎上，再加多10億銀，重點支持機耕機播。
有國策支持，一拖繼續好景。再講，以往一直見紅嘅工程機械業務，呢期經過資源重整後，有番睇頭。齋計項目以往見紅6、7千萬銀，到可以收支平衡，已經好襟計。一拖今年純利係咁易增長30%到3.17億銀，預期PE10倍。呢轉博一拖升30%，到5.55港元，目標價PE都係得13倍，有盈利增長做後盾，呢個PE水位，仲係好吸引。
首長四方博升2成
首長四方（730）由4月中到上星期，短短個半月，最多跌咗近50%，價殘有得諗。首長四方近年積極發展數碼內容發行及展示業務，09年度就成功虧轉盈3870萬銀（08年虧損1.2億銀）。要咁睇，全球電影業採用數碼化嘅強勁需求，單係祖國已經係大市場，照計首長四方啱先步入高增長期。呢轉先嚟短打，博升20%，到0.69元，PB都係1.24倍。
錢雋