女子組合at17除了喜歡唱歌，林二汶喜歡繪畫，而盧凱彤（Ellen）則喜歡影相。Ellen愛攝影，更愛影相的原始感覺，就算科技再發達，數碼相機像素已推陳出新去到多少萬像她也懶理，因她只鍾情菲林相機。
影相六年，每次影完相，乖乖的走到冲曬店等候成果，這是她享受影菲林相機的地方。她說：「我好鍾意上菲林嘅感覺，而且影相嘅時候，你唔知出嚟效果係點，整個過程有一份期待同驚喜。」
盧凱彤還有一個嗜好，便是到處搜集古董二手相機，現在她分別擁有NikonFM2、Contex645、海鷗、Lecia和Pantex菲林機等，她周遊列國必會一機在手。 撰文：王連連
《貓物語》
結他催眠曲
「我屋企啲貓最鍾意瞓覺。每日十分七時間都見到佢哋喺度瞓。間唔中見佢郁動真係好難得，嗰日貓貓坐喺我一支好鍾意嘅結他隔籬，睇佢幾懶洋洋，逍遙自在，搞到我都好想瞓。」
失儀小黑貓
「我好鍾意喺屋企影貓，佢哋有好多小動作，但要捕捉得準就好難。相中係我第一隻貓蘇菲，有朝早我起身，見到佢坐得好粗魯幫自己冲凉，佢好鍾意戙起腳，我即刻拎部機影低，咁啱用緊120菲林。睇到呢幅相，就感覺到貓咪高傲嘅一面。」
結伴搵周公
「佢哋係我另外兩隻貓，虎紋嘅係DJ，白色毛係TOMTOM。我有日返到屋企，冲完凉佢哋已經瞓晒，仲瞓埋一齊。我要靜靜雞去影佢哋，有種偷窺嘅感覺，好得意。今次就用咗110菲林嘅！」
《景物篇》
樓梯‧人影
「悉尼歌劇院門外，我坐喺樓梯Hea咗一個下晝，好舒服，就影低呢一幕啦！但我唔鍾意普普通通咁影，所以影少少樓梯，又影少少自己。」
擁抱‧東京
「我用咗日光機配Slide，不過冇用閃燈，喺東京鐵塔最高位置影落嚟。部相機可以喺好暗嘅地方唔用閃燈，但都影到好光，而且微粒唔粗，家部相機炒到好貴，要千幾蚊喇！」
《人物誌》
維他奶奇遇
「我用咗第一代半格菲林，可以影到72張相。通常影影吓就會唔記得邊張相夾邊張相，要等曬出嚟先知係點，好多時候都有驚喜o架！相入面嘅女仔係我朋友，嗰日同佢去郊外玩，仲記得當時嘅情況。」
家有一帥哥
「相入面嘅人係我哥哥。當時我哋夾緊歌，本身佢都幾靚仔，但我喺側面睇佢係背光位，所以即興影咗落嚟。張相我用咗海鷗二手機影，120菲林，好平嘅相機，400幾蚊，但影啲相都好好睇。」
鴨寮街伯模
「今次我用NikonFM2影嘅，有次我去鴨寮街尋寶，去到一間專賣黑膠碟嘅舖頭，個老闆就向我介紹咗佢手上面嘅黑膠唱片，佢仲將碟入面送嘅3D眼鏡戴住畀我影相，好好笑。有時我會去廟街，都影過唔少相！」
