呢輪泰國局勢平靜，泰國旅遊局有意喺暑假推出優惠套餐吸引港客。旅遊業議會主席胡兆英話，業界有可能喺暑假推出999蚊五天曼谷團喎。小妹覺得暫時係得個講字啫，廉航AirAsia就唔同嘞，佢哋見到啲自由行旅客蠢蠢欲動，即日推出「泰國我們與你同在」活動，免費送出10,000張機票去曼谷。旅客只要即日起至6月1日期間上網（ http://www.airasia.com）預訂6月7日至8月31日期間出發嘅機位，有機會獲得免費機票。
當地商戶都大劈價
暑假唔使錢搭機去曼谷好吸引，但都要當地冇事先得，否則貼錢都唔去啦。小妹搵身處曼谷嘅胡慧沖（Roger）了解當地巿面嘅情況，佢話呢幾日巡過四面佛一帶拉差巴頌街等早前衝突嘅地區，四面佛恢復正常，大街變得車水馬龍，「四面佛都開番正門，開始有人去還神。」
Roger好開心話，衝突區附近嘅SiamParagon、SiamCentre等商場都開番晒啦，「我入去行過，可能係平日啦，人流冇咁多，但係foodcourt都幾多人嚟食嘢。SiamOceanWorld入邊啲魚完全冇事。」Roger話，當地商戶都推出齊齊大劈價活動，喺paragon商場Imax戲院睇戲，只需要100銖（大約港幣25蚊），此外SilomWalkingStreet行人購物街成700間攤位呢幾日都低至二折起賣貨，希望吸引番啲遊客嚟曼谷玩噃。
電郵：mailto:[email protected]