歐洲債務危機蔓延，連鬥牛國家也變成泥牛入海，未知幾時可以冇事，全球一體化後，資金來得易，走得快，走遲點隨時一頸血。因此有人在靜市買樓，或多或少與此有關，起碼買樓夠實在，跌市可住可租，不會變為一堆廢紙。
本地客準備執筍貨
樓價下跌反而推動成交，一方面用家趁機換樓，焦點集中藍籌屋苑靚單位，如靚則、靚海景或特色單位，買家還價狼過華秀，大玩15、20，還價由10%起步，心態弱的業主無奈接受。另一方面，細價屋苑業主可議價比率大升，基本上10個業主，10個都有價講，包括優質單位在內，成交量率先反彈，如沙田第一城和九龍灣淘大花園等一直受上車客歡迎的屋苑，在上周末睇樓量回復到今年初。
靚貨出籠有一個意義，就算多年看好後市的業主也趁高位套現，擔心「蘇州過後無艇搭」，他日後悔賣得遲。這類心態充斥藍籌屋苑內，但讀者要小心避免錯誤解讀，以為樓市喘定，再重回追價的遊戲。
下月南非世界盃開始，樓市應該無太多變化，同時新盤無奈避戰，單靠一兩個貨尾做唔起。老樓反而覺得正值東邊無戰事，有心買樓人士，可趁這段空餘時間多些睇樓，可能隨時執到筍貨，尤其可吼年初由內地客買入的藍籌屋苑，他們可能會避免上會而劈價出貨。
溫州客炒燶將軍澳樓
老樓聽聞，鑑於內地地下錢莊滙水有難度，不像以前一個電話便有「人仔」入境，內地銀行收水，限制資金炒樓炒股，個別持重貨的內地炒家，走得一件便一件。早排將軍澳有班溫州客炒燶樓，蝕讓放售一批單位，這些落難內地同胞見風聲緊，要錢唔要樓，走得快好世界。
這類資金來歷不明，來港時通常由熟客轉介或拍代理門，月前便有一批溫州客在西九四小龍一帶摸代理門口，掃入多個單位，現成交期臨近，代理尚未成功與「大客」取得聯絡，亦打定輸數，搵定新客承接，好過一個仙佣都收唔到。
劉兆昌
http://www.HKLau.com