西九文化區新任一哥、老外行政總裁謝卓飛今年8月返工，呢幾日嚟港了解民情，馬不停蹄拜訪本地藝術團體，噚日又約記者去飲茶。粵劇界喺香港舉足輕重，佢前日去演藝學院，睇咗學生為佢預備嘅一台大龍鳳，睇完讚不絕口。
謝卓飛同八方講，西九文化區規模龐大，要兼容藝術同商業元素，佢拍心口保證西九唔會變地產項目。至於地標性博物館M+，佢形容會充滿創意，同傳統博物館好唔同，不過仲未有時間為M+搜羅收藏品。
近年全球建築材料成本猛升，謝卓飛預計西九工程成本會上漲，佢話當前急務唔係起樓，而係培養市民對藝術嘅興趣，否則無人入場。立法會撥款200幾億元俾西九，預留做教育款項唔多，謝卓飛話會向董事局爭取開設新嘅藝術教育總監，同埋喺開設藝術學院。