鄭嘉穎及李璨琛昨日於深水埗為無綫劇集《怒火街頭》拍攝外景，吸引大批市民圍觀，劇中李璨琛的店舖被無良奸商加租逼遷，眾人於店外抗議，身為好友兼律師的嘉穎即以法律途徑為其解決。
「喺波枱上面搞」
首次飾演律師的嘉穎直言有壓力，他說：「因為好多法律上嘅用語要好小心準確，特別拍攝上庭嘅戲份。」
嘉穎表示雖然對白難記，但會當做磨練，他又自爆早前與胡杏兒拍攝一場親熱戲，乃入行以來最大膽，他說：「我哋仲喺乒乓波枱上面搞，場戲拍咗成兩個鐘，但出嚟嘅效果一啲都唔色情，仲好搞笑。」兩人可有尷尬？他說：「咁又冇，不過佢俾我啲鬚根磨到塊面損晒。」對於有指唐詩詠與黃嘉樂再次傳出緋聞，身為兩人契哥的嘉穎表示絕不相信。
採訪：王崇穎 攝影：陳順幀