裁判官力撐雪糕仔，輕判罰款之餘整句「希望下次可以光顧你」令人發出會心微笑。我一向以為類似對白，只會出現喺戲劇入面嘅裁判官口中，你話嗰位裁判官有冇因為當今律政司長嘅爸爸都做過雪糕仔，而影響今次判決？唔重要囉，公道自在人心，食環署今次難洗草率兼欠彈性嘅形象，怕且要好好處理突如其來嘅中環鼠患，加番分囉。
矯枉過正嘅事，周圍都有，智利足總禁止世界盃參賽球員接受傳媒額外訪問、所有專訪都要收錢，但諗清楚，班智利國腳唔透過傳媒增加自己嘅曝光率，就冇咁容易惹嚟五湖四海球探嘅注視，最後蝕底嘅咪又係班球員。足總短視糊塗，好彩隊波教練比爾沙唔係，智利實而不華，明日穩贏北愛爾蘭。
藍鑽石
主客和：智利勝
心得：北愛唔多識入波
近5場往績：LWWLL