《打擂台》以功夫掛帥，卻有反智的構思。講打講殺來自年過半百的梁小龍、陳觀泰、陳惠敏、泰迪羅賓等一班演員。但二人導演組合郭子健、鄭思傑卻硬說這是部青春到不能的勵志電影，
似乎決心擺下擂台挑戰觀眾的極限。但單是小龍哥心中那團足以燎原的火，
就知道青春不是單靠表面，勵志也不是年輕人獨家。撰文：何永寧、魯萍
對於80後的年輕人來說，65歲的陳觀泰及58歲的梁小龍未必人人認識，前者唯一印象可能是《殺人犯》中被推落樓、昏迷不醒的老差骨；後者印象較深，都只停留在周星馳電影《功夫》中殺氣騰騰的火雲邪神。但對60、70後的中年人來講，對他們的名作可以話如數家珍。
「上得台就要贏」
當年練就一身大聖劈掛功夫的泰哥，在69年橫掃全東南亞國術擂台大賽勇奪冠軍，被他KO的對手不計其數，之後加入影圈所拍的《馬永貞》、《大哥成》和《成記茶樓》等功夫電影已被奉為經典。梁小龍更不用講，當年亞視年代將陳真一角演活儼如代言人，程度一如今日甄子丹演葉問，走紅省、港、澳，不但幕前好打，街頭爛仔交更有一打十五的不敗記錄。
當然俱往矣，不過《打擂台》中夕陽遲暮守候昏迷不醒師傅及拳館的師兄弟角色，正正是他們的現實寫照，梁小龍日前首先發言：「戲裏面我嘅性格同現實好似，好勇鬥狠由始至終都好希望喺擂台上打一場。我戲裏面有一句格言，亦係我嘅座右銘『唔打唔會輸，上得台就一定要贏』。想講嘅贏未必真係打低對手，贏嘅係心態，到咗我呢個年紀仲有個心上擂台面對挑戰嘅決心。」
今時今日的梁小龍仍然打着電影這個擂台，可見他心中那團火仍然燒得很熱，他說：「世人眼光好膚淺，見你衣着唔光鮮就睇你唔起。你唔好理我年紀，總之我話你聽今日請我拍戲都係超值，同我合作完嘅武師，個個都拍住手送我出片場，老闆買埋頭等機票請我返香港。」
緬懷師徒情義
比較沉默的泰哥亦說：「導演同我講呢部係青春片，佢話青春係一種狀態，唔係年紀。總之你唔計得失成敗，努力博盡一分去做一樣人哋認為無意義同蠢嘅事就係青春。」勵志的地方在片中講得明白，就是不會放棄一樣自己覺得對的事情，不論年紀、不問身世、不計成敗去完成目標，正正是青春的體現，所不同的是後生讓你有更多時間去奢侈，陳觀泰認同這種說法：「所以我好珍惜同享受家每一部電影，每次都當最後一部去演。」
除了勵志，片中還談及人生觀，單是泰迪羅賓這位師傅跟兩位徒弟情如父子的關係，現在可算是碩果僅存。到目前為止，梁小龍仍有開班授徒，對這方面體會較深，他說：「以前後生收嘅係學生，係一買一賣嘅關係。家陣收嘅係徒弟，關係好密切，似父子，除咗武功仲會教佢哋做人道理。戲裏面講嘅師徒今日已經好難搵到，我覺得時代越進步，人嘅關係越疏離。以前嘅社會真係本住『人人為我，我為人人』，今日你隔籬屋姓乜你都未必知，成日左防右防。」所以兩人對片中的師徒情義感覺特別窩心。
解構必勝元素
自言香港打交最多，保持超過150場街頭爛仔戰不敗的梁小龍，自小已習各家武術，最後獨修詠春及空手道，皆因覺得這兩門武術最科學：「詠春教你打直線，因為直線係最快。空手道就更加科學，教你點樣發揮體內潛能。」
小龍又謂武術沒有必勝，只有拳怕少壯，他說：「我未輸過係因為夠大膽、唔怕痛捱得打、體力好。我講嘅係街頭爛仔交，唔係武術比賽同表演。點解泰仔咁好打，佢哋打輸冇飯食o架，你話有錢人同窮人邊個好打。」
故事簡介：羅新門拳拳到肉
阿成（陳觀泰飾）為破舊羅記茶樓掌櫃、阿淳（梁小龍飾）為廚，皆年過半百，二人守候昏迷30年的師傅羅新（泰迪羅賓飾）蘇醒。但光陰磨蝕兩師兄弟的鬥志與武功，阿成鐵手已廢，阿淳一腳已殘，一度叱咤武術界的「羅新門」變成街坊聚腳的酒樓。
地產公司信差梁竟祥（黃又南飾）被派往茶樓收樓期間，被惡霸欺凌，為路過的淳出手相救，令祥燃起學武鬥心欲拜淳為師，誤打誤撞間令昏睡30年的羅新奇蹟蘇醒。醒來的羅新記憶錯亂恍如老頑童，把祥誤認作徒弟，成、淳二人反淪為徒孫。剛巧業主叢生猛（歐陽靖飾）所屬的武館舉行自由搏擊比賽，他欲借比武之名挑戰羅新門來收回茶樓，令淳等為尊嚴再次握起拳頭而戰。
《打擂台》上映日期6月3日
郭子健、鄭思傑 自認契弟博一鋪
《打擂台》演員無疑是夢幻組合，梁小龍、陳惠敏、陳觀泰等，都是獨當一面的武打巨星，大前提是電影至少要早拍30年。是不少圈中人對兩位《打》片導演郭子健、鄭思傑的告誡。對於上述忠告，兩人只是打個哈哈就蒙混過去，鄭思傑日前說：「呢套絕對係商業片，只不過你覺得演員方面未係最吸引到觀眾嗰班，但都有人聽到cast之後好興奮話咁古怪一定要睇，因為70、80年代呢班人真係好打到街知巷聞，仲周圍撩交打。」
畀機會老馬發火
郭子健又開始發言說：「如果30年前拍呢部片，感覺就好似今時今日拍《十月圍城》加《投名狀》咁，啲人覺得拍嘅人如果唔係張徹、楚原都會係吳宇森，點會係我哋呢兩個契弟。」郭、鄭兩位導演表示電影構思源於啟蒙老師之一的泰迪羅賓，鄭思傑說：「同郭子健讀完導演會編劇班，之後成日上泰迪嘅studio度劇本，佢周時同班老band友喺度夾band，咪睇佢嘅年紀有番咁上下，嗰團火好多後生仔都不如。」
票房聽天由命
片中梁小龍有一句座右銘「唔打唔會輸，上得台就一定要贏」，郭子健說：「啲人成日話電影圈青黃不接，已經冇人才。但我覺得作為觀眾，有冇人嘗試畀個舞台呢班仍然好出色嘅演員，將最好嘅發揮出嚟。我想話畀佢哋知，其實係有選擇，係佢哋唔去揀。」
擂台擺開被指過份大膽，他們又有另番體會，鄭思傑說：「部部戲都係博，《十月圍城》同《投名狀》唔係博呀，根本做電影就係一場賭博，比劉德華同甄子丹你都係博，博法唔同。不過今次真係要多謝劉德華，唔係佢投資都拍唔成部戲，套戲拍得出等如我哋上咗台，我哋已經係贏家，輸贏票房點就要睇天命。」
採訪：何永寧
