泛民周五開例行飯盒會，噚日討論事情包括5.16後、6.23表決政改方案前，泛民有甚麼活動可合作，重新凝聚民意反政改方案，點知大部份與會者好似食滯咗咁，冇乜反應。
據講之前幾次飯盒會，都有討論政改方案表決前搞大型活動造勢，高潮當然係6.23表決當日，坐埋開會嘅泛民黨派都興致勃勃，對號召市民包圍立法會，好似反高鐵時咁喺中環展示人民力量冇乜異議，殊不知噚日熱情驟然冷卻，對動員支持者反政改冇晒反應。
除公、社兩黨外，其他泛民黨派近日輪流去中聯辦，既然同中央有偈傾，自然唔方便搞其他動作。同枱食飯，各自修行，就係咁解囉。