1968年，年僅四歲的呂珊首拍電影做童星，至今入行逾40年，下月終於有機會在紅館舉行首個演唱會，直言百感交集，又承諾屆時會施展渾身解數，將最好的一面獻給樂迷，更笑言會完全豁出去，要幾性感有幾性感，還會大跳辣身舞，來一個大解放。
呂珊今年終於如願以償，於下月3日在紅館舉行首次個人演唱會，難免百感交集，但興奮多於緊張，她說：「家仲未感受到緊張，因為每日嘅時間表都排得好密，不停操fit自己，排舞、做運動、記歌詞，一得閒就同隊band綵排，希望出到台將自己所有嘅表演，做到十成咁送畀觀眾。」
努力記舞步
呂珊為了今次演唱會，準備了不少突破，她笑說：「總之豁出去，可以幾性感就有幾性感，仲會同班舞蹈員辣身舞。」戲言自己擁有一顆少女心的呂珊，坦言起初與舞蹈員排舞時，感到尬尷萬分，尤其與男舞蹈員有身體接觸時相當不自在，她說：「其中有啲舞步係要俾人抬起，又會好似係咁摸我個身咁，開頭真係唔係好慣，都會窒一窒，之後排多幾次先開始好啲，家要好努力記住啲舞步，希望到時令人眼前一亮。」
屬唱得之人的呂珊，眼見身邊好友如張偉文等逐一在紅館開演唱會，心中也曾有過焦慮，其實早在兩年前她已有過在紅館開騷的機會，她說：「其實之前有兩次都可以喺紅館開演唱會，不過每次都係因為接咗劇，所以取消，上次就係因為拍《宮心計》，當時覺得好難得有個咁好嘅角色，惟有要有所取捨。」問她喜歡拍劇還是唱歌？她坦言：「真係揀唔到，兩樣都係我鍾意嘅。」
採訪：胡比 攝影：陳俊強
場地：海逸8度酒店