近日內地網民激辯iPhone軟件下載情況，有知名博客指出，調查後發現78%嘅iPhone用戶，買機後冇安裝任何新軟件，而向中國聯通（762）買行貨iPhone嘅人，亦冇乜用增值服務，只當佢係普通電話。不過，有網民反駁話，絕大多數用家都會將電話「越獄」（即解鎖下載盜版軟件），要乜有乜，根本唔存在以上情況。
呢場激辯反映幾個值得深思嘅問題︰首先，智能手機支付困難，簡化程序刻不容緩。有內地朋友話，連信用卡都未能普及，用手機付費嘅人極少；第二，盜版問題嚴重，軟件開發商同電訊商要透過手機下載賺錢，一啲都唔易，三網融合嘅發展步伐未必有預期咁快。正如微軟估計，中國盜版軟件市場規模超過75.8億美元，遠較印度嚴重；第三，唔好高估智能手機用戶嘅數據需求，貴價手機對部份人只係時裝同身份象徵。況且，多數Apps都係來自海外，對內地用家吸引力有限。
補貼勁 冇肉食
內地iPhone客消費力成疑，令人擔心聯通靠iPhone脫穎而出嘅成功機會。聯通自從5月開始加大iPhone手機補貼，平均減幅1000元（人民幣．下同），月費低至96元，仲驚唔夠平推出36元預付3G月費計劃，目標係今年新增1000萬3G客，手機補貼最多50億元，最終益晒蘋果。
比較中國移動（941）上客速度，去年3G客551萬，今年首季增至769萬，增速39.6%；聯通更由274萬客大增76%至482萬，可見減價同iPhone的確有利上客，預計未來幾個月將進一步受聯想（992）嘅樂Phone銷情刺激，上客再提速。
可以預期，以後每逢聯通公佈上客數字，都會出現短暫嘅炒作空間，但要留意第二季度業績，睇睇毛利會否受手機補貼影響。因為單係今年首季，聯通嘅2G每戶收入已回落5.5%至39元。試問3G預付計劃仲平過2G，有乜辦法唔減價？
相反，中移動以平價OPhone、走入農村同發展商用客嘅策略漸見成效。透過這種低成本、高效益嘅市場定位，成功機會遠較聯通「賠本式」經營高，亦更貼近國內市場需要。
胡孟青