大家都知小妹加入咗「龍友」行列，買咗部單鏡反光機假日出街影吓靚仔。德國老牌相機Leica噚日開設全港首間嘅相機品牌專門店，仲一開開兩間，分別喺時代廣場同中環IFC，小妹梗係要去捧場。Leica喺香港賣咗好耐，點解無端端設專門店？本港LeicaStore董事梁冠成（Rico）笑笑口話，家香港品牌相機都係批畀街外嘅零售商賣，Leica想做得專業啲，由專人面對面教啲客點樣使用。
旗艦機一個月有貨
Rico又強調，外邊啲零售店見Leica啲機供不應求而炒高價錢，一啲熱門嘅機種，仲比Leica嘅建議零售價賣貴三成，所以諗住用專門店㩒低炒價，等消費者可以用合理價錢買機，「以X1嚟計，定價$16,800，外邊賣到2萬幾蚊。」原來啲相機舖食水咁深。
Rico補充話，X1可以話係超級數碼儍瓜機，近年刮起「龍女」風，吸引咗唔少女仔買X1，賣點之一係CMOS感光元件，高到1,220萬像素，而每個像素都好有效採光，大大降低雜訊，影出嚟嘅相達專業級數；旗艦機M9像素去到1,800萬，全片幅規格，賣$59,000，「喺外邊店買M9要等半年，呢度買一個月有貨。」同場又展示咗七部無價嘅Leica限量版，包括編號001嘅M8.2同D-Lux4兩部國慶60周年紀念版。
電郵：mailto:[email protected]