陳慧琳（Kelly）去年7月誕下蝦餃仔劉昇（Chace），自從蝦餃仔百日之後，就沒再透露囝囝近況。她昨日在網誌上載囝囝新相，10個月大、重26磅的蝦餃仔，已長大成有一頭濃密黑髮，眼似爸爸、眉似媽咪的大BB，鍾意食香蕉、奇異果，又會「ba」、「ma」發單音傾偈，Kelly每日跟着囝囝通屋爬，開心做最幸福的潮媽。
陳慧琳昨日應fans要求，在網誌上載了囝囝劉昇的新相。新相前日在家中拍攝，10個月大的蝦餃仔，遺傳了父母的手長腳長，看來似有一歲多，更有一對大眼睛和一頭濃密烏黑長髮，表情多多，相當趣致。
負責衣食住行
Kelly在網誌上說：「收到好多你哋嘅信同埋留言，都話好想知道Chace嘅近況，佢家10個月大喇，重26磅。」Kelly負責囝囝的衣食住行，爸爸劉建浩就負責影相，紀錄生活片段和將來返學等事宜。Kelly對囝囝健康營養非常緊張，經常看書和問醫生，注重吸收蛋白質、鈣質，餐單由西蘭花、魚，到各式各樣的生果，包括蘋果茸、琵琶茸、香蕉和奇異果等。
Kelly說：「BB最鍾意周圍爬來爬去，所以要貼身睇實佢。噚日佢第一次喺度講『ba』、『ma』，之後仲講咗好多嘢，好似發表偉論咁，都唔知佢其實講緊乜，不過好開心，所以想喺呢度同你哋分享一吓！希望BB同埋你哋都健健康康啦！」
親為囝囝剪髮
蝦餃仔識爬，Kelly每日就跟着囝囝通屋爬來爬去，兩母子樂在其中，Kelly更為囝囝剪頭髮，一家人又不時去公園曬太陽。為了不想錯過囝囝成長每一步，Kelly現時工作都盡量只飛一天。至於何時再生，Kelly助手Leo昨日在電話說：「Kelly都係順其自然，個天幾時畀多個佢，佢咪再生。」
採訪：DebbieLum
