周星馳終於有動作，將電影相關資產注入即將改名為比高集團的帝通（8220），刺激股價最高升至0.29元，收報0.285元，升幅26.1%。星俠本月中曾推介過該股，買入原因亦係相信星爺會伺機注資，結果預期兌現，一直有跟進之散戶應該有錢落袋。
今次星爺呢款動作，不禁令人想起其以前一套電影作品《食神》，套戲入面有一部份係講主角搞一盤生意，然後部署日後上市，未睇過之散戶，不妨搵來望望。
港股再反彈200幾點，最值得散戶高興係二三線股普遍升幅不俗，最勁係急升41%的中信21世紀（241）。不過市況陰霾未全面消除，散戶入場要懂得控制注碼。
北控水務（371）今個月一直捱沽，日前跌至2.35元的3個月低位，終於出現反彈，昨升近7%收報2.75元，升勢一度觸及20日線，近期該股升跌跟隨大市步伐，若然市況轉穩，估計北水股價走勢有望喘定，後市只要2.6元守得住就唔怕「上車」，中線可升返高位3.26元。
方星俠