有東方諾貝爾獎之稱嘅邵逸夫獎，噚日公佈第七屆得獎者。六嬸方逸華一如以往在記者會現場打點，細微至點解宴會廳入口迎賓枱冇人坐都過問，十分肉緊。八方想打聽吓六叔同陳總近況，可惜六嬸唔答。
楊振寧話唔奇
邵逸夫獎設三個獎項，每項獎金100萬美元，今年得獎者都係美國學者。天文學獎由約翰霍普金斯大學嘅CharlesL.Bennett及普林斯頓大學嘅LymanA.PageJr.和DavidN.Spergel一齊奪得，佢哋嘅研究有助精確測量宇宙學基本參數。美國加州大學三藩市分校DavidJulius獲生命科學與醫學獎，以表揚佢喺皮膚感知疼痛方面有開創性發現。普林斯頓高等研究院教授JeanBourgain則獲數學科學獎，佢研究製造隨機數理論。
評審委員會主席楊振寧話，冇華人得獎唔奇，因為頒獎原則睇學術成就而非國籍，相信總會有華人得獎嘅。