同張學友、南非歌手K'mann合唱世界盃主題曲《旗開得勝》嘅內地小天后、25歲嘅張靚穎，自稱係「波牛」一名，日前接受內地傳媒訪問，講起足球嘅時候就生猛晒，簡直係將豪爽真性情展露無遺，大發對世盃嘅偉論，仲逐一論盡對卡卡、美斯、基斯坦奴朗拿度（C朗）嘅睇法，各大球迷又睇吓呢位踩過界嘅球評家係點樣評球星先！
C朗太炫耀唔啱feel
3大球星都曾榮膺世界足球先生，好波就舉世皆知，張靚穎讚唔讚都好似冇咩所謂，之不過佢自稱係全國著名女球迷之一，我哋就睇吓佢嘅論點先！佢話佢都係鍾意睇美斯踢波，原因係美斯踢波賞心悅目，仲讚美斯嘅運球、射門嘅動作行雲流水，極為連貫，敵方球員好難知道佢想射門定係傳波喎！
而鍾意巴西嘅卡卡就係情意結，話卡卡係佢嘅白馬王子嘅類型；之不過講到葡萄牙嘅C朗嘅時候，張靚穎即時狂插，話C朗係炫耀派，睇佢踢波好似睇佢踩單車咁，係咁插花搞到眼花繚亂，睇到人好鬼攰喎！
各大球迷唔好以為張靚穎狂讚美斯，就以為美斯係佢嘅No.1，其實卡卡先至係佢嘅最愛，佢話卡卡畀到佢一種虔誠嘅感覺，做人同踢波都好有信念喎！見到佢呢個咁嘅講法，真係即時O晒嘴！之但係換個角度睇，查實張靚穎嘅足球水平已算高於一般人o架喇，同埋睇足球比賽都係為咗心情放輕鬆，畀對足球有熱情嘅人共聚、分享歡樂、吹水嘅地方，大家興高采烈嘅時間互相亂噏一餐，對與錯從來都唔存在喺足球世界之內呢！
張靚穎必睇賽事
12/06 阿根廷vs尼日利亞
17/06 阿根廷vs南韓
19/06 英格蘭vs阿爾及利亞
25/06 葡萄牙vs巴西
張靚穎小檔案
年齡：25歲（11/10/84）
專項：歌手
官網： http://www.janezhang.com
衫衫不盡
售賣熱點︰KitroomSports
地址︰旺角亞皆老街50號4/F
網址︰ http://www.kitroomsports.com
《趣聞》
俾你貼呃鬼一定儲唔齊
相信本港有唔少球迷都有玩「俾你貼」嘅世界盃集圖冊，不過應該玩到火都嚟。我求大俠聽啲同事、朋友同網民講，原來有200張貼紙係從來冇喺香港出現過，當中包括全隊智利國家隊，咁即係你爆幾多盒都儲唔齊；我求大俠就喺facebook搵到「俾你貼」代理嘅回應，話喺前日即係26號開始會有批新貨到香港，到時就會有番之前冇出現過嗰200張貼紙。但問題係，佢哋點可能將一批貨當兩批貨出，好有搵笨之嫌啫。我求大俠仲收到風，有人唔知用乜嘢方法班到啲智利球員嘅貼紙，擺喺Yahoo拍賣，但要成10蚊一張，真係好搶錢。話時話，上個月喺巴西，有5個荷槍實彈嘅賊人劫走675,000張貼紙；唔知香港今次缺貨，同呢單嘢有冇關係呢？
梅拿炒單車好彩皮外傷
玩越野單車係德國訓練嘅一部份，點知湯馬士梅拿（圖）就喺禮拜三出事，唔小心炒咗車，搞到下巴要縫針同埋塊面損晒，膝頭都傷埋，不過好在只係皮外傷，冇傷到啲肌肉、骨同埋韌帶，如果唔係就大件事。事關隊波經已有隊長波歷克因足踝受傷打唔到，若然冇埋湯馬士梅拿，咁就真係廢咗一半武功；查實法國之前透過玩沙灘車操體能時，加拿斯就玩到翻車，幸好佢個人冇事；而呢啲訓練方法可能好有用，但始終有一定危險，所以我求大俠奉勸用呢種方法訓練嘅球隊，要小心睇實班球員。另外，德國日前同地方球隊南提洛爾嘅U20比賽，憑高路斯同埋馬里奧高美斯各入5粒而大勝24:0；起碼佢哋冇葡萄牙咁無恥，強陣對魚腩佛得角連1球都入唔到。
巴西鬥北韓最強對最弱
世界盃冠軍誰屬，就要到7月11日先至知，不過32支決賽周球隊最新國際足協排名，就已經出咗，巴西（圖）就壓住西班牙成為「1哥」，兩支世盃奪標熱門球隊亦喺足智彩調查中，成為最多人捧嘅世盃決賽組合。至於決賽周中排名最低嘅係邊隊？就係北韓，佢哋排第105位，比主辦國南非嘅83位仲要低。不過，如果有睇北韓日前友賽對希臘場波，相信呢個排名唔代表佢哋冇實力，淨係「核彈頭」鄭大世都令其他對手唔敢睇小佢哋；而有咁啱得咁蹺，北韓同巴西係G組對手，而且第1場就碰頭，可謂32強之中名副其實嘅排名「最強對最弱」之戰，又會唔會有咩意外賽果出現呢？
世盃A-Z
S（Suspension）
球員於決賽周時領紅或累積兩黃，接着的比賽便要停賽（Suspension）。因足踝受傷缺席今屆賽事的德國中場波歷克，在02年決賽周，因在4強對南韓時領第2面黃牌，故無法在決賽上陣鬥巴西。結果德國0:2負巴西，屈居亞軍。
T（Three）
在世盃歷史上，有3（Three）個國家的捧盃次數是在3（Three）次或以上，分別是巴西（5次）、意大利（4次）及德國（3次）。
U（Uruguay）
首屆世盃是於1930年舉行，並由烏拉圭（Uruguay）主辦。該屆他們於決賽以4:2反勝另一支南美球隊阿根廷，成為首屆世盃冠軍。
V（Vuvuzela）
魔鬼喇叭（Vuvuzela、圖）為南非球迷專用的打氣工具，吹出來的聲音，與一大群黃蜂來襲很相似。
話你知：國家英雄冇面見人？
巴西在70年世盃奪冠，為史上第3次奪標，獲永久收藏雷米金盃，故74年的第10屆世界盃，為首次頒發沿用至現在的大力神盃冠軍獎盃的一屆；主辦國西德由碧根鮑華率領，在決賽以2:1反勝告魯夫率領的荷蘭。海報以抽象形式表達最終成為國家英雄的球員樣貌，充滿動感之餘，亦引發球迷無限想像。
球場介紹
綠點球場
GreenPointStadium
簡介：位於首都開普敦市中心，是為今屆世盃決賽周興建，交通便利，球場設計以環保為原則，包括盡量引入天然光以省電，上蓋亦用上特別物料，藉此避免場內聲音散出，減少對附近居民的影響。
城市：開普敦
容納人數：66,005
12/06 A組 烏拉圭vs法國
15/06 F組 意大利vs巴拉圭
19/06 C組 英格蘭vs阿爾及利亞
21/06 G組 葡萄牙vs北韓
25/06 E組 喀麥隆vs荷蘭
30/06 16強 H組首名vsG組次名
03/07 半準決賽
07/07 準決賽
麥邦比拉球場
MbombelaStadium
簡介：球場是為世盃決賽周而全新興建，可舉行欖球、板球及田徑等運動比賽，球場命名來自南非11種官方語言其中一種的siSwati。另外，非洲大型野生動物園之一Kruger亦位於球場附近。
城市：尼爾斯普魯特
容納人數：43,589
16/06 H組 洪都拉斯vs智利
20/06 F組 意大利vs新西蘭
24/06 D組 澳洲vs塞爾維亞
25/06 G組 北韓vs科特迪瓦
