雖然5.16變相公投過咗近兩個禮拜，社會各界仲反思緊公投運動嘅成敗得失。喺當日參與公投補選嘅芸芸眾生當中，對低投票率耿耿於懷嘅，除咗余若薇、周澄同長毛之外，仲有一班默默耕耘通宵唔瞓嘅基層勞工。
成件事要由上年底政改方案推出時講起，泛民立法會議員不滿煲呔翻叮爛方案，於是發起五區總辭。呢個時候林公公為咗煽動納稅人反對公投，就話五區補選會浪費1.5億公帑。不過呢筆數一直被人懷疑係作大靠嚇，同政府當年嘅167萬移民潮一樣為求目的不擇手段。
搬運公司：被跣咗鑊甘
政府唔係普選產生嘅，自然唔需要向人民交代條數點計。但係八方知道，淨係搬運票箱嘅預算，政府都作大咗四倍。公投之前，選舉事務處招標請搬運公司，預算苦力一百人，喺投票後嘅凌晨兩點至七點幫手搬運選舉物資。搬運工人時薪80蚊，搬五粒鐘可以收400。點知，當晚用咗一粒鐘就搞掂晒所有搬運工作，工人只係收到80蚊，幾乎水腳都蝕埋。
好多工人感到受騙，一來懷疑搬運公司食夾棍，二來批評選舉事務處亂開空頭支票。八方都認為事件有可疑，既然無所事事嘅中策組顧問佳叔事前都批死公投注定失敗，政府點解會預算搬票箱搬足五粒鐘？唔通選舉事務處都認定佳叔係燈神，深信全港三百幾萬選民都會出來投票？
八方問過承判呢單工作嘅搬運公司，負責人聲稱佢哋都被選舉事務處跣咗鑊甘嘅。佢話問過選舉事務處點解會咁，對方話因為好多人唔投票，所以失咗預算。搬運公司仲話政府到家都仲未找數，公司要墊資出糧畀工人先，又話會倒貼車馬費50蚊畀工人。
選舉事務處：實報實銷
選舉事務處好求其咁回覆八方，話部門同搬運公司簽訂嘅合約清楚講明，搬運費係以實報實銷原則，按實際工時計算。又話搬運公司同工人之間嘅糾紛，政府不便介入。睇到呢度，大家就會明白，點解公投費1.5億，有心浪費公帑嘅係邊個。
mailto:[email protected]