由許志安、張衞健（Dicky）、梁漢文同蘇永康組成嘅BigFour，噚日喺紅磡舉行記者會，宣佈7月10號喺澳門舉行「TheBigFour演唱會澳門站」。四人先喺台上同司儀傾偈，佢哋被問到澳門騷有啲乜嘢想做好啲，安仔講笑話：「上次梁漢文飛上空中彈琴，我就喺台度勁跳，我想今次公平啲，我升上去囉。」Dicky即時寸安仔話：「好，下次畀你升天呀。」
爆蘇永康出蠱惑
之後四人接受訪問，問佢哋今次會唔會請鄭秀文做嘉賓，安仔即時語塞，Dicky就代答：「其實未諗到，想請陳奕迅囉，上次夾唔到時間。」安仔話今次三面台，可能安排上會有少少唔同，但大致內容都差唔多。
有傳BigFour個節目《BigFour大四喜》因為四大唱片公司同無綫嘅問題，請唔到嘉賓，但都要頂足10集，Dicky話：「嘉賓我哋一早都度好咗10幾個，知道有啲可能度唔到期，家都錄咗7集，係我哋想請嘅人。」安仔話本來想請Eason，佢話：「佢咁鍾意講嘢，請佢最啱，不過因為嗰個問題（Eason屬四大唱片），冇辦法，影響唔大。」佢哋仲話因為四人嘅期太難度，一定唔會再添食。
席間Dicky又踢爆康仔陰招，Dicky笑住話：「我有啲唔開心囉，康仔着到成個拿督咁，之前明明係叫我哋三個着西裝，點知自己唔着，玩突出。」康仔笑話：「咁講，我惟有啃啦。」Dicky即指住康仔話：「仲笑喎，不知廉恥，真係日防夜防，家賊難防。」