【本報訊】歐洲債務危機陰霾籠罩全球。港股應聲暴瀉，恒地（012）主席李兆基表明暫不買港股，轉投樓市。不過，長實（001）主席李嘉誠則唱反調，除認為通脹將會重臨，手頭鬆動的可放心買樓自住外，又表示可趁低吸納股票，更表明已入市增持旗下公司，並會繼續買。記者：劉碧思
港股昨日一度再跌穿19000點水平，李嘉誠昨日在長和系股東會後，被問及現時是否撈底良機時回應：「今日嘅股票有高有低，但很多人低嘅時候唔敢買，慌會跌得更低；高嘅時候趕快去買，趁現在個勢好。其實應該冷靜啲，看佢嘅P.E.（市盈率）、潛力，同埋負責嘅高層人員是否真係為股東爭取利益。」
他承認，前天已入市增持長實及和黃（013），但未透露金額，短期內會繼續增持。根據聯交所資料顯示，李嘉誠上周四以每股平均48.728元，增持14萬股和黃，涉及資金約682萬元。
揀股心得要睇市盈率
他亦首次開腔談論入股嘉盛控股（729），「有時有某個機會，有朋友提議，我知佢（嘉盛）做嘅主要業務，我聽到應該前途好嘅，我就去買，買了持有，不會短期用嚟炒賣。」
他趁機教散戶如何揀股，「我自己投資股票都幾十年喇，一九五幾年開始投資，係積蓄式嘅投資。我第一睇公司嘅潛力，睇P.E.、即係earningpower（賺錢能力），然後計算係咪應該投資。例如一家公司表面上睇幾好都好，P.E.太高嘅時候，除非賺錢能力特別超脫，如果唔係小小意外，P.E.一高，係唔值得買入。」
李嘉誠早前把個人持有的部份長實股份，轉移至家族信託基金，他解釋沒有特別意思，「我個人好簡單，過去十年，只有買沒有賣，長實、和黃都係，買買吓，一段時候就唧落去家族基金。」
除了可趁低吸納優質股，被問及現在買樓是否合適時間，他回應：「現在都跌了幾個巴仙，加上呢個風潮之後，將來通貨膨脹係一定。」他指出，只要是自用，加上手頭鬆動，買樓不會有問題，但強調「手頭緊嘅人夾硬借錢嚟買就唔值得。」去年5月，李嘉誠亦曾提及通脹快將重臨，有利樓價。
有興趣競投各區地皮
對一般市民來說，現時或是置業時機，作為發展商，長實亦擬趁低吸納土地。李嘉誠指出，現時長實負債比率低於8%，加上地產是集團一個本業，即使土地儲備足夠未來4至5年發展，不論是哪一區地皮均有興趣競投。
對於政府的「9招12式」，長實副主席李澤鉅稱，集團的內部指引，部份與政府招數相同，故影響不大。李嘉誠則稱：「我哋兩父子大家有商量過，最緊要配合政府，總之照啱規矩做。」不過，若有「唔啱規矩」的，則會向政府反映。
