浸會大學校長吳清輝做埋下個月退休，噚日佢約傳媒告別。做咗九年校長，喺浸大服務25年，吳清輝話好唔捨得，透露早幾年本地另一大學想撬佢做校長，佢諗來諗去都係決定留低，做到退休。
太太爆借花敬佛
吳校長噚日披露唔少秘密，例如佢最鍾意打籃球，鍾意食乾炒牛河，校長太太吳郭蜀華送親手做嘅紀念品畀記者，八方有條小金魚掛飾留念。吳校長難得拖埋太太見傳媒，吳太好坦率，同記者爆咗校長兩單瘀嘢，話說當年結婚之後，吳校長工作繁忙，成日都唔記得老婆，有日卻拎咗紮花返屋企，吳太鬼咁開心珍而重之，點知吳校長話只係借花敬佛，紮花本來係校方送畀到訪外賓，由於來賓唔記得拎走，佢唔想浪費，一於執死雞。
吳太又話，老公喺外國揸車成日瞌眼瞓，一家三口條命喺晒佢手，吳校長就度咗條計，叫老婆同個女喺後座唱歌令佢保持清醒，吳太話，兩母女由英文歌唱到鄧麗君，校長先可以一路向邊荒出發。
八方冇多問吳太母女歌喉如何，有此抵抗睡魔功力，應該都係超級巨星級數。