長和今日開股東會，電視廣播（TVB，511）股東會噚日已經舉行咗，地點依舊響老地方九龍香格里拉，但當中亦有少少變化。大家唔使驚，我哋仍然見到102歲嘅六叔同75歲嘅六嬸好恩愛咁手拖手蒲頭，仍然見到「最靚嘅80（歲）後」利孝和夫人為大家示範旗袍，只係唔見咗自稱年過半百嘅「老翁」陳志雲唧。
咁大師俾老廉請飲咖啡單嘢有咩進展？TVB大大大內總管李寶安話，「陳生家仍然係我哋嘅executive，暫時佢無履行到佢嘅工作，件事都係調查緊，相信要等到調查有啲進展先知點做。」咁點解會整單咁杰嘅嘢先？「我哋係上市公司，亦係傳媒機構，一直係受法律監管，一路都有將呢個意識灌輸俾啲同事，大家亦依法辦事，過往、將來都會係咁做。」
咁係咪現存制度有漏洞呀？「個別事件唔反映制度有咩特別漏洞，我相信同類事件過往都會響同類型機構發生，件事仲係調查緊，咁我哋會睇睇調查結果，會檢討吓自己嘅制度係咪完善……」李生其實唔使講咁多嘢，5個字已經講完──咪就係「樹大有枯枝」囉！
李華華