大埔區中學本周一舉行一場以「五區變相公投對政制發展弊多於利」嘅辯論賽，正、反雙方分別係英中沐恩中學同中中神召會康樂中學，結果沐恩勝。不過有自稱康樂嘅學生，將聲稱係辯論隊負責老師寫嘅電郵放上網；電郵指辯論賽由三名民建聯成員做評判，佢哋對議題有偏見，所以判正方贏，康樂輸得寃枉。
辯論賽籌委之一係民建聯大埔區議員譚榮勳，佢身兼評判，其他四個評判分別係民建聯區議員李國英、中聯辦新界工作部副處長黃燦彪、民主黨大埔區議員關永業同教院助理學生事務處處長黎國雄。五個評判中，三個屬建制派，難怪康樂輸得唔服氣；譚榮勳知衰，對安排評判團有偏頗致歉。
大會搵專家覆檢評分
不過佢否認評分有政治因素，指當日結果一面倒，佢畀兩隊平分，其他四個評判，包括民主黨關永業，都畀沐恩高分過康樂。譚榮勳指康樂台上辯論員表現唔錯，台下就差啲，因此整體輸畀沐恩。
事件未完結，由於康樂提出抗議，大會搵專家覆檢評分，若專家冇異議就維持原判，否則會追頒冠軍畀康樂，變成雙冠軍。