西環近日車水馬龍，中聯辦開門見客，繼民主黨同後，噚日招呼普選聯，規格同之前一樣，派專車去中環接送，美中不足係冇預備頭套、面具畀普選聯代表笠頭，待客稍嫌不周。
湯家驊：唔想似囚犯
中聯辦日前刻意秘密接送民主黨入內見李剛，咁鬼祟好似有乜嘢不可告人之秘咁，因此普選聯七名代表噚日分別上咗兩架房車後，都第一時間拉開車窗簾，資深大律師湯家驊特別敏感，「唔想好似囚犯咁俾人送入去。」
同車嘅黃碧雲就話，車窗簾好難拉開，相信係因為坐中聯辦車出入嘅人習慣唔見光，窗簾長期唔拉開，生晒銹啦。佢同窗簾搏鬥咗成程車，落車前兩分鐘先拉開一半窗簾。坐另一架車嘅李卓人話，車窗簾幾乎紋風不動，幸好佢冇密室幽閉症，否則未去到西環就出事。
湯家驊、黃碧雲等人噚日喺中聯辦外俾記者影相，阿人等人坐嘅車卻直入地牢停車場。阿人形容當時都怯一怯，「唔知車我哋去邊喎！」中聯辦唔想記者影到泛民入內，其實應該提供頭套、超大遮光太陽帽畀客人笠喺頭上，家陣搞到咁狼狽，何苦呢！七個人集合後，雖然唔使安檢就去見李剛，不過黃碧雲話中聯辦人員都幾緊張，佢提出去洗手間，都有專人跟尾，唔知係咪怕佢蕩失路。
幾日前率先見李剛嘅何俊仁話，入到中聯辦即時有幾部相機幫佢哋影相，佢自己同卿姐、張文光都唔敢笑得太寬容，恐怕被人指鬆毛鬆翼，尤其係卿姐，擺出惡女唔好惹我表情。
會面初時未入正題，仁哥話同李剛等人吹水成10分鐘，講佢廿幾年前去北京新華門外請願陳年舊事，「當時我請願後，仲有人請我飲茶。」
閒話過後，餘下兩小時雙方各自表述，仁哥稱講咗一個鐘頭左右，有人送上咖啡。原來中聯辦都幾體貼，李剛講嘢冇新意，聽到人瞓着，送上咖啡正好提神。會面兩小時灌咗唔少咖啡、茶落肚，仁哥臨走前要到洗手間放低少少嘢，真正來也匆匆，去也冲冲。
mailto:[email protected]