馮仁昭四圍超：
引尊古錫搞三角戀　鞏俐軟攻兇狠發哥 - 馮仁昭

周潤發、鞏俐、渡邊謙同荷李活演員尊古錫（JohnCusack）合作嘅新片《諜海風雲》（Shanghai）下月17號喺內地上映，發哥同鞏俐繼《滿城盡帶黃金甲》後，再次扮演兩夫妻。發哥喺片中扮演心狠手辣嘅黑幫大佬，但對住老婆就細心體貼，具備雙重性格。

發哥紋巨龍

劇情背景係1941年日本艦隊偷襲美國珍珠港前嘅4個月，嚟自美國嘅尊古錫去到上海追查好友被殺，期間認識咗黑幫大嫂鞏俐，佢美艷樣貌同神秘背景深深吸引住尊古錫，三角戀一觸即發。劇情交代飾演黑幫大佬嘅發哥平日好勇鬥狠，其中有幕講佢左臂受傷，所以拉低上衣畀老婆鞏俐照顧，發哥嘅肩膊同胸口處紋有巨龍，充滿殺氣。
鞏俐性格柔情似水，呢一幕佢着住透視低胸衫，坐喺發哥身邊拋胸貼身照顧。發哥嘅《上海灘》堪稱經典，今次再挑戰黑幫大佬角色，佢話有更大發揮空間。眾演員下月會拉大隊到內地為新片造勢。