立法會議員個人利益監察委員會早前接獲投訴，指長毛透過身兼保險經紀嘅兼職職員買保險，質疑佢益自己人有利益衝突，委員會經調查後，噚日發表報告，認為長毛冇違反議事規則及申領發還工作開支指引，投訴不成立。
秘書處被建議修訂指引
監察委員會主席梁劉柔芬指事件中冇人刻意隱瞞，長毛同個職員都有清晰申報利益，而且兩個人都冇保險公司嘅財務利益或控制權；由於冇利益衝突，所以長毛買保險前唔使索取三份報價。委員會又建議秘書處修訂指引，更清楚說明利益衝突範圍，並將「從交易獲取財務收益」包含在財務利益的涵義中。
呢個投訴喺五區公投前爆出，梁劉柔芬強調在補選後公開報告，絕無政治考慮。長毛稱樂意接受傳媒及公眾監察，呢單抹黑嘢，顯然係衝着公投而來。