社民連號稱網上執政黨，原來不堪一擊，官網近日冧咗，只係得句英文話系統要Upgrade。八方問黨秘書長季詩傑何事，佢話有人hack咗社民連個網。阿季話早幾日已發現個網唔多妥，前日詢問網頁寄存服務商，對方話冇做upgrade工作，相信網站俾黑客騎劫。
網上執政黨被五毛黨低好冇面，阿季話今日會報警。佢又指社民連經費少，租唔起獨立server，令黑客輕易入侵，慶幸佢哋黨務冇乜嘢唔見得光，被人偷睇都冇有怕。
講開網上恐慌，原來o靚界「民主女神」周澄都出事，gmail戶口噚日無端端自動logout，再登入就指佢最近一次登入係喺中國境內，嚇到佢以為戶口被入侵，後尾搵電腦高人了解，好彩虛驚一場。