好耐無評論股市的恒地（012）主席李兆基，終於重開金口話如果無金融大風暴，港股係19000點可企穩，但又話暫時唔會買股票。講真呀四叔，如果唔係呢場風波，港股都唔會跌成咁喇！
不過，四叔強調睇好香港房地產，會用錢投資；樓市正處低潮，四叔判斷後市睇好，換言之如果你信佢，又有閒錢去守的話，似乎趁低潮買樓有得諗。前排無數「80後」打鑼打鼓猛話樓價好貴買唔起，家陣樓價已回落唔少，又睇吓呢班人係咪會去買？若然根本無條件，就無謂咁多說話。
置業在乎自己能力，無錢咪努力去搵咯！港股萬九點失而復得，個別股份亦似成功打底，可伺機短炒。勝利管道（1080）日前急瀉並創下52周低位1.35元，隨即由低位絕地反攻，昨隨大市升5.2%，收報1.63元，收復10日及20日線，料反彈有餘未盡，後市有力上攻自4月中高位2.08元延伸之下降軌阻力，可吼位買入，若成功突破50日線（1.74元），可見2元，失守1.5元止蝕。
方星俠