身為I.T（999）老闆嘅沈嘉偉，終於由娛樂版回歸財經新聞版！江湖傳聞話，沈生上個月喺「大劉」尖沙嘴個新場「TheOne」租咗個大舖，要搞間全港最大旗艦店咁話。華華一直無chance證實呢個消息，估唔到下個禮拜終於有機會！有口痕經紀同華華講，沈生鐵定下星期二蒲頭，主持I.T個業績記者會，見吓投資者同傳媒朋友。
下星期二主持業績會
咁又有咩出奇呢？梗係有啦！事關沈生行事作風真係非一般低調，佢簡直係惜字如金，唔鍾意見人又唔鍾意講嘢，一年四季淨係鍾意同佢老友城城打吓邊爐，自己間公司由05年上市到家，出嚟見人嘅次數絕對唔夠3次。咁點解今次又要粉墨登場？鬼咩，一直係I.T代言人、唔係負責着衫淨係負責講嘢嘅盧永仁，呢頭話要令I.T市值翻三番，「壯志」都未酬，舊年呢位副主席突然走人，沈生咪惟有自己頂硬上囉！
講番擁有「天地雄心」嘅盧博士，佢話過只係鍾情做大公司，但家似乎仲未有着落。華華先排響四季撞到佢，估唔到又肥咗一個碼，問佢家撈咩，佢笑笑口答咗句「湊仔」就快閃鬆人……各大上市公司，有興趣不妨搵搵佢。
李華華
mailto:[email protected]