《G組-葡萄牙》
日本前晚喺友賽輸0:2俾來訪嘅南韓，樣衰同埋核突到爆，但拍落葡萄牙度真係小巫見大巫。事關葡萄牙同日喺主場以強陣約戰超級弱隊佛得角，最後竟然開個0:0波膽出嚟；事後基坦奴朗拿度（C朗）仲無恥到話和波都唔係太差嘅賽果。好彩呢場足智彩冇開盤，如果唔係啲球迷肯定俾佢哋跣鑊金。
射門欠奉賽後多藉口
對住嚟自非洲、世界排名係117嘅佛得角，葡萄牙排出嚟個陣算好有誠意，卡維奴、迪高、拿尼、列特臣同埋C朗等球星都正選登場，但咁又點呀，弊在冇創意；成場波搵腳似樣啲嘅攻門都冇，結果以0:0完場；雪上加霜嘅係，佢哋仲有中場堤亞高文迪斯傷出，可能參加唔到世盃。貴為今屆世盃其中一支爭標分子，佢哋對住佛得角呢啲魚腩，連波都入唔到，球迷梗係唔收貨，但C朗同埋教練基羅斯都竟然覺得冇問題，你話佢哋係咪無恥呀。
C朗話：「其實我哋備戰咗冇耐，所以唔認為和波有好大問題。到咗世盃，我哋一定可以踢得好啲。」基羅斯就話：「對於嗰啲對備戰唔知頭唔知路嘅人，梗係容易搵到嘢嚟插我哋。今場只係練習賽，我哋班球員啱啱歸隊，只係一齊練咗幾日，你唔可以有太多要求。」離世盃開幕得番兩星期左右，葡萄牙未上力之餘仲喺度諸多藉口，我求大俠真係戥佢哋擔心。
摩佬上「馬」C朗任
葡萄牙國家隊唔多掂，但摩連奴呢位葡萄牙名帥就熱爆歐洲。國際米蘭班主莫拉堤承認摩連奴喺國米嘅日子經已完結，仲話會尊重對方嘅意願，但莫拉堤點會咁順攤，據報話佢要求皇馬畀番1,600萬歐元嘅分手費，先至肯放摩連奴走。另外，摩連奴未上「馬」，但講明只要C朗喺球場上有好表現，話之佢周圍女。唔知C朗聽到之後，會唔會更加落力比賽呢？