民主黨副主席劉慧卿前日有份見中聯辦幹部，除咗為香港爭取普選，原來卿姐都好關心緬甸嘅民主進程。就喺同中聯辦開會前幾日，卿姐同香港爭取緬甸自由聯盟召集人區美寶齊齊去咗緬甸，同昂山素姬領導嘅反對派「全國民主聯盟」四個中委會面，了解吓佢哋即將舉行嘅大選，究竟會唔會有真普選。
中國記者要求做訪問
緬甸係獨裁政府，表面上一人一票，軍政府卻有嚴格篩選機制，冇佢哋欽點連名都報唔到。不過就算選舉大勝都冇用，好似廿年前嘅5月27日咁，昂山素姬雖然俾軍政府軟禁，但喺全國民主聯盟攞到八成二選票，軍政府一樣夠膽唔承認結果。
講番卿姐今次緬甸之旅，當佢哋見完反對派領袖，就即刻俾當地執法人員擺明跟蹤，跟到返酒店。之後忽然有個自稱係中國記者嘅人，話知道卿姐係香港立法會議員，要求同佢做訪問，卿姐警覺性好高，拒絕咗。當地反對派都有要求卿姐向中國政府反映吓，叫強國唔好再撐獨裁軍政府，不過卿姐都好老實咁話，佢自己都返唔到大陸，愛莫能助。