無綫生活台之前嘅皇牌節目《志雲飯局》暫時停業之後，電視台臨急臨忙搵咗許志安、張衞健、梁漢文（Edmond）同蘇永康一齊主持《Big4大四喜》嚟頂替，高層一心諗住以佢哋四個喺圈中人脈應該可以請嚟唔少有份量嘅嘉賓，但係呢個如意算盤打唔響，因為佢哋主要嘅朋友都係歌星，好似陳奕迅、李克勤同譚詠麟等，幾乎全部都係四大唱片嘅人，佢哋因為同無綫版稅問題仲未解決，所以根本唔可以亮相，搞到佢哋四個邀請嘉賓頭都大晒。
馬時亨節目救亡
不過無論如何Big4都會撐完10集為止，但電視台見咁嘅情況，立即叫馬時亨錄影主持節目以備不時之需，馬時亨日前馬上搵咗同係基督徒嘅鄭秀文錄第一集。
此外，噚日Big4去到鴨脷洲錄影新一集嘅《大四喜》，今次嘉賓係何超儀同任賢齊，其中一個話題係「老婆/女友批准出軌一次，珍貴機會送給誰？」安仔一聽到就話：「揀張茜，因為鍾意佢講廣東話唔正。」健仔就還以顏色話：「我就鍾意天后，要瘦硬硬淨淨。」講到咁明顯，係人都知講Sammi。
超儀安仔下體
話題去到超儀時，安仔玩踢爆話：「陳子聰唔使批准，佢已經出軌好多次。」何超儀即刻瞪大眼望住安仔話：「擺明中傷佢，不過如果佢個機會係畀安琪蓮娜袓莉就冇問題，因為我都好鍾意。」超儀見安仔玩得咁過癮，話諗定喺節目會問安仔個鼻同下體係咪成正比，佢話：「不過我唔覺，因為同佢出過好多次海，有留意呢樣嘢，等於男仔睇女仔一樣。」明寸安仔唔夠料。
