花旗股市上禮拜五反彈1日之後，前晚又跌番晒，除咗話投資者憂慮經濟前景之外，歐洲債務危機再成為炒家議題，歐元係咁俾人質，投資者情緒轉淡，咁啱南北韓局勢又有變，北韓下令軍隊做戰爭準備，亞洲股市有乜法子唔散？港股淡友喺期指結算前把握機會發動攻勢，結果恒指下跌682點收市，睇嚟好友要大反攻都唔容易。
昆侖C輪19984：昆侖能源（135）昨收9.99元，跌1%，算係好穩，股價企喺近日橫行區收市，短線有機試10.4元，破位睇11.4元，可以諗吓隻C輪19984。隻輪現價11.4仙，2010年10月18日到期，行使價10.48元，溢價16.32%，引伸波幅52.75%，有效槓桿4.48倍，正股見11.4元，19984睇19.8仙，正股跌穿9.5元就沽咗隻輪。
俊樺