半山干德道、旭龢道交界有唔少大樹，最近幾個月路旁卻少了樹蔭，原來康文署樹木隊頻頻出動鋸樹，住喺附近嘅測量師學會前主席張達棠睇唔過眼，向議員劉秀成投訴。
質問林鄭月娥
劉秀成同八方講，實地視察後發現好多棵樹被斬，康文署解釋因為有樹木被細菌感染，恐防塌樹危及市民，所以要斬樹，由於擔心旁邊樹木都有病，因此寧枉毋縱斬多幾棵。
劉秀成話如果樹木真係有病，先斬後奏無可厚非，但斬樹後應該種新樹同保育附近環境，家陣斬完就算，剩低個好似砧板嘅樹幹底部，又以石屎覆蓋泥土，咁求其，令人擔心香港綠化前功盡廢，今日會喺立法會追問發展局局長林鄭月娥，究竟政府想點。