李家誠早前以18.2億投得山頂地皮起家族大宅，徐子淇昨晚開心大談看地經過，買地十足如買菜般。她謂現時計劃起三間風格相近的獨立屋，結合傳統新潮設計，備有大草地供老爺四叔散步及囡囡踩單車。對有傳她擇嬰兒性別做人工胚胎植入，她否認並指身體未全面康復，要待半年後才再生。
徐子淇昨日在灣仔出席中國著名雕塑家瞿廣慈作品展《飛天使者》，原來她買了一對合共16萬元的天使雕塑，作為幼女李晞兒的一歲生日禮物，所以特別捧場及索取簽名。子淇謂原定只買一個粉紅色，但大會她多買一個粉藍色，謂「可能下一胎生仔」，所以買夠一對。
「老公鍾意新潮」
其夫李家誠早前以18.2億投得山頂白加道35號地皮，呎價更打破紀錄。一身Gucci的徐子淇透露買地經過，她說：「幾好笑，笪地係有次我同老爺搭車經過見到，老爺話『子淇，呢度有笪地，叫阿誠去買吖』，我話『好貴o架，你買啦，我哋得閒嚟探你囉。』之後老爺話『唔使喇，我買，預埋你哋一份，你哋上埋嚟一齊住。』所以會起三間屋，每人一間。」
徐子淇謂估計三年後入伙，由於三間獨立屋要統一風格，所以要斟酌設計風格，她說：「好想快啲搬入去住，因為會有大花園，老爺可以散步，小朋友可以踩單車．我同老公就鍾意新潮啲，玻璃透視，open啲，老爺就鍾意傳統嘅，我起初想起一間木屋，用太陽能好環保，不過老公話阿爸唔會鍾意。」
試天然法生仔
幼女生日當天，徐子淇謂舉家到澳門玩，卻在購物商場見到棄嬰，她說：「係成批保安圍住一個一歲嘅男仔BB，BB好污糟，車入面放咗大批衫同奶粉，估唔到啲人可以咁，我拎咗阿女啲餅畀佢，同埋教導埋阿女。」有傳她揀嬰兒性別做人工胚胎植入，她即說：「冇，我未可以生BB住，最少要半年後，家做多啲planning先，我都想試啲天然方法，成功嘅話會公開，至於人工呢啲，可能係畀年紀大啲嘅媽咪。」
採訪：JessicaNgan
攝影：PangChungYin
