生產玩具嘅工業股龍昌（348），金融海嘯後一直維持虧損狀態，啱啱仲發埋盈警，話主要因來自無線遙控玩具及高端產品定單疲弱，同原材料成本上升所致。諗住上公司網頁睇睇乜嘢高端產品出問題，又的確發現有問題，不過唔係產品，而係網站被不法之徒Hack咗！順便做個申報，本人揸住呢隻股超過兩年。
公司雖然蝕緊錢，我亦只當佢係一隻殼股揸住唔放，但連小小一個網頁嘅網上保安亦不足，見微知著，投資者又點會對公司投信心一票？
言歸正傳，原先市場認為龍昌泊到日本大玩具廠包括Bandai、Tomy同全球最大嘅Mattel等碼頭，生意可望大為改善，但以上半年蝕3963萬元，毛利收窄至15%，兼夾預期全年仲要蝕錢，反映下半年營運情況改善程度好有限。反而Mattel經歷季度虧損後，首季已轉賺2480萬美元，公司07年屈中國生產嘅玩具安全有問題（及後公開道歉自認係設計問題），但能夠喺咁短時間擺脫逆境，策略上值得學習。
Mattel故事值得學習
Mattel嘅故事，正好說明中國代工生產業嘅悲歌──利錢被壓榨。即使規模大如富士康（2038）嘅大廠，海外買家一樣無面畀，壓力由上而下，最後員工當災。業績全靠Barbie食糊嘅Mattel，最近喺上海開設全球首間Barbie旗艦店，樓高6層，裏面點只玩具咁簡單，除咗餐廳、真人Size嘅Barbie衫時裝店、卡拉OK，仲有化妝品同全粉紅嘅SPA。有冇人去一件事，但宣傳效果就一流，據聞成個概念係出自本地美容界名人嘅手筆。
企業要變通，唔能夠獨沽一味食老本，新嘅成功營商方程式，係以品牌同消費者建立「超友誼」關係，就好似蘋果（AAPL）成功提升你每個生活環節同使用電腦嘅模式。消費者只要受落，就會不知不覺被洗腦，乖乖奉上鈔票。
講到底，其實呢啲咪又係Marketing，今時今日除咗夠潮夠爆之外，更加要照顧到消費者需要，從Mattel嘅成功例子，其他零售品牌要保住人氣，就要諗計點樣時時刻刻保持新鮮感。
胡孟青