西門町小美國　有味牛

旅遊記者經常鑽牛角尖，捐窿捐罅搵埋啲偏門題材。去到台北，你好可能還是會走一趟西門町，食一碗阿忠麪線好，買老天祿鴨舌也好，幾老奉都好你都會到此一遊再遊。因此，我不如話你知西門町除了買手信外，仲有咩買更實際。再因此，我要說以下這條美國街。

記者、攝影：曾冠輝
鳴謝：台灣觀光協會、中華航空

滿街Graffiti

沿西門町昆明街，走着走着見到一個美國旗圖案的招牌，指進窄巷，唔使識中文都知呢條係「美國街」。未曾拐彎轉角，已見牆上繪滿塗鴉，如果有人用超能力將你瞬間轉移送到這角，張開眼你會以為自己身處L.A.某陋巷。稍一用神，你才看出這裏的塗鴉比較雜亂，甚至稱得上鬼畫符！不過再往巷裏走，其實也有更繽紛更精采的，還是有其街頭藝術味。美國街於數年前在西門町開始成形，自06年昆明街重鋪後，聚集了一些熱愛美國街頭文化的店舖，賣tee、踩板、塗鴉、二手店乜都有，知碇的人會自動對號入座走來入貨，就像只有80米長的小美國。這小美國相信比大美國好得多。

■非常有美國後街街頭味。

■「畫廊」！

街頭離不開板仔

先是塗鴉，後來見到的，是板仔。美國街頭不可能少了踩板的人，而台北的板仔都識得嚟到SkateBoarding入貨或改裝滑板，甚至在門前踩起板來。店內牆壁掛滿各式滑板，每塊都似一幅縮小了的塗鴉，齋放都已經有型。除了賣板，店內理所當然地以賣板仔tee、cap帽為主，放眼都是Alphanumeric、RVCA、C1RCA等來自北美的板仔大牌子，款式相當齊全，唔愛板的愛tee人都會揀得啱。原諒我戴有色眼鏡，預設了「板仔＝寸嘴＝懶有型」，傾落至知我錯了：「很少被人這樣拍，會害羞耶！」店員兼板仔其實相當靦腆兼友善：「周五、六晚門外不時有板仔聚集踩板，非常熱鬧！」好踩板者應該知道幾時到訪啦！

■滑板款式甚多，4、5嚿水有交易。

■tee$311、帽$335

■C1RCAtee$238

a.Skateboarding
地址：峨嵋街103巷7號
網址： http://www.skateboarding.com.tw

美國潮Tee

嫌板仔tee太男仔？轉個街口仲有一間賣tee的，同樣是RVCA卻girlish得多。「我們主要引進RVCA的tee，貪其布質較好，亦愛其美國風圖案。」店員是個非常地道的台灣可愛女生：「台灣人要麼跟着日本潮流走，要不便是美國風，我還是覺得美國style比較灑脫有型，不是嗎？」綜觀店內陳列過百件不同款式的tee，男裝、女裝、鬆身、收身都有，而且店面陳設簡單利落，較富空間感，行起來亦比較舒服。「咦？請問這賣不賣？」「哈哈，這可是非賣品唷！」除了可愛店員，我還看中的反而是擱在一旁當佈置的少女單車。

■民族味長裙亦有。$448

■出得遲咗少少，五區公投時着啱晒。$138

■亦有具graphic設計玩味的tee。$158

■怪新娘tee$138

b.UnschooledSportswear
地址：昆明街96巷24號1/F

■店面佈置簡單利落。

二手市場直接取貨

「咦？請問這賣不賣？」「哈哈，這可是我們老闆的寶貝！」別以為是印刷問題，我確是在兩家不同的店內看中了當佈置的單車，打岔想說是台灣的單車文化，讓我心動。同樣以一輛非常有型的單車作佈置的，有這家「美國二手貨市場」：「論整條美國街，還是我們最有美國味吧！」作為街上唯一二手服飾店，店裏可謂「雜崩冷」，乜都有，二手牛、tee、袋、皮靴、皮鞋、軍褸、玩具……醞釀得滿舖二手味！別怪店裏堆滿貨，從來行二手店就像尋寶，芸芸舊衫之中一定有好嘢，消費科水不但是金錢，還包括時間與心機。
「我們的貨都是直接取自美國二手店的，味道嗎？都是美國人留下來的，哈哈……」最美國味這頭銜當之無愧。