職業足球員除咗隊友同對手外，最常碰面就可能係傳媒朋友；西班牙頭號門將兼隊長卡斯拿斯，就「近水樓台先得月」，今年初媾掂西班牙電視台靚女主播莎拉卡邦拿路（SaraCarboneroArevalo），仲有機會喺世界盃期間，同女友喺南非朝夕相對。
世上最性感女記者之一
卡斯拿斯貴為西班牙同皇家馬德里首席門將，外表同身形又唔差，一向桃花運都好好，之前就同西班牙小姐伊娃干沙利斯（EvaGonzalez）相戀，不過已經散咗。以卡斯拿斯咁嘅條件又點會冇女伴，今年2月西班牙狗仔隊就拍到佢同莎拉約會，好快仲公開埋戀情㖭。
香港球迷或者未必太認識呢位女主播，25歲嘅莎拉，06年喺馬德里大學畢業後，就加入馬卡電台體育頻道，主打國內籃球；當然以佢一雙電眼，加上迷人笑容，好快已經轉職幕前，07年5月轉去電視台做體育記者，09年4月加盟Telecinco電視台，擔任體育主播，更加被雜誌《FHM》選入世上最性感女記者之一。
做得體育主播，少不免要對西班牙最受歡迎嘅運動足球做吓評論，之前巴塞隆拿同皇家馬德里喺西甲鬥得如火如荼之際，莎拉好「中立」咁講：「我覺得熱門只有一個，就係巴塞隆拿，皇馬表現很好，但要攞冠軍太難，世界最佳球員就肯定係美斯。」冠軍最後真係如莎拉所言，落喺巴塞身上，不過卡斯拿斯都冇怪女友，事關女友之後補番飛：「卡斯拿斯係世界上最出色門將，由佢帶領下可以助西班牙奪得首個世界盃。
南非做直擊見餐飽
莎拉所屬電視台，已決定到時安排莎拉去南非直擊；奉勸卡斯拿斯要保持定力，唔好日頭撲波，夜晚又撲向女友懷抱，專心幫西班牙贏世界盃更緊要。
卡斯拿斯
出生日期：20/05/1981（29歲）
國籍：西班牙 位置：門將
現效球隊：皇家馬德里
國家隊上陣：102次
衫衫不盡
售賣熱點：球迷世界
地址：旺角信和中心11字樓04室
電話：23697822
《趣聞》
老馬抹籮柚都懶
朱咪咪喺一個電視廣告中有句金句：「做人咁隨便，邊有人畀面？」；估唔到，阿根廷國家隊教練馬勒當拿（圖）原來都係呢句金句信徒！話說呢位阿根廷名宿對於球隊喺南非基地嘅設施唔係好滿意，及唔上佢嘅高要求，結果，有關方面花咗1,400鎊（約16,800港元），先至達到佢嘅要求。馬勒當拿有咩要求？包括所有職球員入住嘅房要油白色、裝6部PS3畀球員玩、每日要有10道熱嘅菜式、晚餐後要有3道甜品，同埋隨時要有雪糕供應。不過，最特別嘅係馬勒當拿要喺佢嘅私人套房入面嘅兩個洗手間度，安裝有自動發熱兼有冷熱水清洗patpat等功能嘅智能廁板。有口痕友話，唔通老馬籮柚痕？
卡帥：世盃個波好唔掂
列強備戰各師各法，嗰邊意巴齋谷體能，呢邊英格蘭就狂用波練習射門同控球。英軍領隊卡比路（左）講起決賽周採用嘅新波就猛擰頭話唔掂，表示個波快就夠快，但好難控制，射門又勁飄考起門將，球感同成季踢開嘅完全唔同；惟有每日臨收操前狂練射門，等球員盡快適應新波。卡比路仲擔心喺奧地利集訓個波都咁難捉摸，決賽周喺高原踢空氣稀薄，一傳一射飛去邊更加唔敢諗！話時話，英軍今朝熱身賽對墨西哥，合約關係仲踢緊U字頭國產皮球，星期日同日本拍跳亦未知係咪用番世盃專用波Jabulani，唔趁友賽實戰搵多啲機會踢新波，練習嗰陣就算你射到衝力射球，咪一樣嘥氣！
靴斯戰衣炒到癲
英格蘭66年捧盃功臣靴斯（左），喺2000年為咗留啲生活費畀3個女，將決賽着嗰件波衫以91,750鎊賣出。件10號球衣現時擺喺著名百貨公司哈洛斯展覽到下月14號，被多次問價後，物主地產商人列斯奴已決定放售球衣，標價更加是嚇親人嘅230萬鎊（約2,595萬港元）！成交嘅話，更會打破比利70年決賽黃金戰衣嘅157,750鎊最貴紀錄。價錢翻幾翻，可能係當年割愛價嘅25倍，唔等多10年先賣衫嘅靴斯，真係喊得一句句！件衫有價有冇市？真係令人懷疑。貴到離譜都賣得出嘅話，經典程度絕對媲美靴斯66年決賽射中楣彈落白界嘅問題入球。
世盃A-Z
N（Nazi）：納粹德軍於1939年發動二次大戰，戰事直至1945年才結束，故世盃於1942年及1946年因戰火而暫停。
O（OwnGoal）：烏龍波是指射入自己龍門。已故的哥倫比亞後衞艾斯哥巴因於94年世盃分組賽對美國擺烏龍，間接令球隊無法晉身16強，回國後於一夜店外被槍殺。
P（Pele）：比利於58年開始踢世盃，合共參加了4屆，並於58年、62年及70年助巴西捧盃。
Q（Qualifying）：今屆南非世盃決賽周32支參賽隊伍，除主辦國南非之外，其餘31隊均是透過參加外圍賽而取得決賽周入場券。
R（Ronaldo）：朗拿度94年以17歲之齡出戰世盃決賽周但未有上陣，之後再參加98、02及06年3屆賽事，並於06年助巴西第5次捧走世盃。但他未獲現時巴西教練鄧加青睞，未能5度出戰世盃決賽周。
話你知：個波喺天就捧盃
66年的第8屆世界盃，為所有英格蘭球迷所銘記的世界盃，首次舉辦世盃的英軍憑主場之利，決賽加時贏西德4:2，為英軍足球史寫下首奪世盃的光輝一頁。此屆世界盃除了為開創世界盃吉祥物的先河外，亦為迄今唯一採用吉祥物作構圖的世盃海報，象徵英軍的雄獅快樂地踢足球至天空，猶如預言英軍最終登上世界之巔。
球場介紹
自由邦球場
FreeStateStadium
簡介：球場位於南非中心高原地帶，約有60年歷史，主要舉行欖球賽事，亦是南非足球隊布隆泉及兩支欖球隊自由州印度豹及中央印度豹的主場。進行過修復工程後，進行過洲際盃賽事。
城市：布隆泉
容納人數：45,058
舉行比賽：
14/06 E組 日本vs喀麥隆
17/06 B組 希臘vs尼日利亞
20/06 F組 斯洛伐克vs巴拉圭
22/06 A組 法國vs南非
26/06 H組 瑞士vs洪都拉斯
27/06 16強 D組首名vsC組次名
莫卡巴球場
PeterMokabaStadium
簡介：球場的具體概念主要源於當地標誌猢猻樹（BaobabTree），由於將應付密集式的比賽及訓練，故真草上加了人工纖維，確保質素。場地與波羅瓜尼市中心僅5公里距離，方便球迷入場觀戰。
城市：波羅瓜尼
容納人數：45,264
舉行比賽：
13/06 C組 阿爾及利亞vs斯洛文尼亞
18/06 A組 法國vs墨西哥
23/06 B組 希臘vs阿根廷
24/06 F組 巴拉圭vs新西蘭
